All Posts
同我呢種放任式老母唔同
要約3B嘅話，都係得返星期日晏晝
仲要就地方咁先可以同佢隻盈少見面啊！
因為呢間嘢一開門就好快滿座
所以趁啱啱開舖見仲有位即係走入去
嗌咗嘢食就等，先嚟咗碗味噌湯
加咗麩感覺比一般日式食肆更有「誠意」
味道唔錯唔似求其沖嗰啲咁
同3B一齊點可以無酒飲？！
就算只係小酌一杯都要同佢飲
揀咗梅酒，香甜開胃好好味
店家貼心咁畀咗杯冰慢慢加
始終梅酒咁甜唔溝淡吓唔夠凍無咁好味呀
鹽燒白鱔煲仔飯
一行四個大人一個細路一隻B
除咗兩件無幫襯嘅塞豆窿
四個有三個都係嗌呢兜白鱔飯！！！
實不相瞞我哋就係衝住呢個飯而來
每日限量供應喎，咁早嚟到就係為咗佢
白鱔超～ 厚～ 身～ 油花香味道足
非常彈牙嘅肉質一啲腥味都無
個皮又燒得較脆身兼有炭香
雖然我唔係泡菜國子民
但其實김밥同비빔밥係我其中一樣嘅comfort food呢…
牛骨例湯 | 갈비탕
唔係雪濃湯咁濃郁奶白色嗰隻牛骨湯
然而清得嚟都有牛骨味
鹹鹹地飲落都幾暖胃
石鍋飯（牛肉）| 돌솥밥（쇠고기）
有生蛋啦牛肉啦芽菜翠玉瓜菠菜同甘筍絲好豐富
梗係要落埋拌飯醬先食啦！
即係咁，用料新鮮所有嘢輕輕調味
牛肉滑溜滑溜又有牛味
就算全生蛋都唔會有腥味
再加埋係咪都會將啲嘢變得勁香嘅麻油
石鍋底仲要有飯焦喎
點會唔好食啫？！
拌飯最正嘅地方係唔講唔覺就食咗好多菜
感覺相對身體無咁大魚大肉大負擔
而鍾意石鍋飯因為可以食到最後都係熱
（飯焦！飯焦！飯焦！！！）
食完真係會好滿足㗎～
石鍋飯呢家嘢，清兜係完全無難度（呵呵）
習慣咗用電子貨幣
突然間肚仔餓要食嘢先發現冇cash
附近想食嘅幾間餐廳又cash only喎
好在，都仲有又想試又收電子貨幣嘅餐廳啫（老尷）
等食中…
貝羅菇雙重芝士牛肉漢堡
啊啊啊啊啊！（崩潰中）
餓得滯就咁睇menu見到Best Selling就嗌佢
居然冇睇到menu底部有更想試嘅香芒手打蝦堡㖭！！！
跟配薯條係外脆內鬆軟嗰種
熱辣辣鹹香有滿滿薯味
不過，又未去到唔加茄醬都好食嘅程度啦
個包啲餡係Portobello菇、牛肉、雙重Cheddar Cheese、
生菜、番茄、洋蔥同呢度特製BL醬汁
厚厚一個～
個包係面頭粉粉入面軟身嗰種好吸汁 但係就算我呢種食得慢嘅人去到最尾都唔會濕晒過腍
菇嘅份量都幾多而且好多汁
好彩其中一層融化咗嘅芝士同啲菇黐埋一齊
咁啲菇片們就唔會一邊食一邊跌keep得住優雅
塊牛肉係Angus Beef
如果有樣嘢食好很想食而一直未食到
麻辣鴨血一定係排响top 3
揀咗個唔使等位仲係任揀位嘅時間
尚青商號，我嚟喇（吶喊）
麻辣鴨血煲（配蓬萊米）
恨咗兩三年（無誇張）終於終於終於畀我食到～
要滾滾滾到熱，等待時間唔算漫長
鴨血唔會一夾就散
熱辣辣加上夠麻嘴仔痺痺地
可能對好鐘意好鍾意食辣嘅人嚟講唔算好辣
但係食到咁上下我已經覺得辣到不要不要then喪爬飯
（所以挑戰唔到倒汁落飯去食無鬼用）
夠麻夠香夠辣食得非常過癮啊！
試過打邊爐去叫鴨血
完！全！唔！係！嗰！回！事！！！
麻辣鴨血真係要咁食先好食
通常等待嘅嘢食唔多唔少都會有落差
呢兜無，絕對無！因為實在太好味～～～
跟餐配嘅冬瓜茶
好在除咗飯仲有佢咋
我呢啲唔太食得辣嘅人
冇佢呢啲清香又甜甜地嘅嘢飲真係會辣死 XDDD
enjoy～
佢鍾意米線我就覺得麻麻
我鍾意熱氣嘢佢就係沙律lover
然而，我哋都好鍾意去飲茶
（同埋食拉麵仲有漢堡包blablabla…）
晶瑩鮮蝦餃
去邊間茶樓都好
係咪都會叫返籠蝦餃
呢間本身做牛嘅就無預計整得非常好
不過都叫standard以上嘅
至少，又大隻啲餡又新鮮
係層皮再韌多少少就perfect池喇
粟米煎牛餅
嘿嘿嘿！點都會嗌煎炸嘢嘅
今次留手喇只係叫呢樣
手打牛肉餅味道香又帶筋嘅韌性
有粟米晌裡面食落爽爽地
個脆炸雲吞皮卜卜脆無油臆味
好好食呀！！！
鮮肉灌湯小籠包
嗱～ 雖然呢間係食牛嘅牛嘅
但係我哋見到小籠包呢樣嘢又忍唔住會點
冇話做到啲咩名店咁啲皮好Q薄
都係家庭式手工貨嗰種
唔錯嘅都算係…
佢又又又陪去產檢嘅日子
當然想同佢食返餐好
熱死辣辣梗係去隊返碗丼最happy
唔敢再去日本野又同過佢去鉄火堂喇
吖！諗到去呢間會想翻啅嘅丼屋，gogogo～
叫咩丼都好都會有味噌湯
standard嘢啦…
跟set會有沙律一齊
另外又會好鍾意嘅中華沙律
口味呢家嘢好幾搞笑
竟然世界上有人係呢隻海藻嘅死忠派
大勝丼 咩都有咩都有刺身爆滿丼（大心）
有牡丹蝦兩隻、蟹肉、海膽、炙燒穴子、
帶子、吞拿魚、油甘魚、三文魚籽…
…揭一揭仲見到八爪魚、醋鯖魚同三文魚
哈哈！食食吓見到匿埋咗嘅北寄貝
咪講笑，睇都睇得出啲刺身們有幾新鮮
啲海膽仲要係極味濃嗰隻
牡丹蝦同帶子都係漿口貨色
蟹肉鮮甜，醋鯖魚另成碗嘢唔太漏，正！
飯底有得揀白醋飯同赤醋飯
係隻醋有少少唔同味咁解
而個飯都唔係就咁醋飯that’s all
第一次响荃灣嗰間見無人就入去試吓
不過之後幾次都係去咗深井食
唔係好味而係個份量大啲加上唔使等位
下午茶個量就似一般茶記午餐咁
正餐就似兩個人先食得晒咁
星洲炒米
唔夠香辣亦都唔夠乾身 咪普通少少香料嘅炒米粉咁
經典豬扒包配薯角
豬扒juicy個包上枱都係熱辣辣嘅
係沙律醬唔係千島醬，真好！
涼瓜牛肉飯
涼瓜爽口唔苦，無咩涼瓜嘅特色
牛肉都唔入味呀
一般般嘅碟頭飯咁囉
叉燒炒蛋飯
份！量！好！巨！形！
啲蛋唔使錢咁鬼咁多
味道就okay嘅，蛋都係滑叉燒都腍身咁啦
生滾沙牛窩蛋麵
哈哈個樣好嘔心
唔係出色嘅沙爹牛
係就係熱辣辣不過啲麵就搞到「煮」淋晒
食到後期成pat嘢咁…
芝腿西多士
等到頸都長先等到有姐姐
可惜佢要返菲律賓喇
出咗糧畀佢諗住同佢出街食吓嘢
竟然佢仲豪氣過我要請我食
嗱！我哋要食梗係食Jollibee啦 XDDD
佢仲自己拍板話食菲律賓式點餐
辣雞就必須嘅，Jollibee炸雞當然係配蘑菇gravy
蕃薯條係我鍾意嘅嘢
畢竟食熱氣嘢食到極致真係幾開心
黑牛啦～ 係雪糕加可樂個底仲有朱古力漿
姐姐話食Jollibee嘢飲係要揀呢樣㗎
佢就冇咁熱氣，揀返正港菲式口味嘅意粉
啊！仲有呢個好彩細個掌心嘅mango peach pie
因為個炸pie裡面好鬼甜（笑）
阿姐姐話有時間叫我同阿B去佢度（菲律賓）住到想走先走
就算係咪客套說話都好，多謝晒佢先～～～
今日我大晒嘅日子
佢話我鍾意食乜就同我去！！！
梗係想試吓响晏晝就食串燒啦，嘿嘿～
仲要豪食咁話唔要叫set，散嗌見到咩想要就叫！
汁燒香蔥牛肉卷
薄牛肉卷好乾身
所以有汁同啲外乾內爽嘅蔥墊埋係好重要
岩鹽串燒牛舌
牛脷呢家嘢係咪都會嗌㗎啦！
面頭乾身裡面因為唔太厚都叫有剩返啲肉汁咁
都滲唔少牛嘅香味嘅，算係咁啦都
汁燒鰻魚串
鰻魚鰻魚鰻魚啦啦啦
個蒲燒汁鹹甜度適中魚肉本身較肥膩
不過呢樣嘢都唔容易整得難食嘅
芥末餃子
wasabi香氣令呢隻肉餃子變得特別（啲）
不過個餃子皮都幾厚吓
同埋個底如果煎得再燶啲就好喇…
蟹皇醬蒜香燒北海道元貝
元貝唔會燒到全乾身食得出個鮮味，good～
蒜味道幾突出
個蟹皇醬個味又夠濃郁
可惜搞到蟹皇醬or調味蒜蓉其中一樣over咗
特色三文魚腩
就咁同佢食容易揀嘢
一再多啲人就弊
呢個唔食呢樣嗰樣
嗰個又話唔肚餓唔好嗌咁多
好啦咁，最後個份量變得…
同佢平日我哋兩個食得晒嘅份量差唔多 XDDD
醬滷拼盆
一次過食墨魚、紅腸、豬耳、豬腩肉、溏心蛋、韭菜同豆腐
無一般潮州老舖咁死鹹
不過又講唔出有咩特別驚艷之處咁
（可能因為有我唔食嘅紅腸啩）
椒鹽孖寶一口方塊
鹹嘅椒鹽豆腐 x 加煉奶就甜嘅炸饅頭
香口嘢，正！
最正係啲炸蒜粒
所以饅頭鹹甜食都可以
冬菜粉絲蒸九肚魚
好啦個個都話自己熱氣咪揀一碟炸嘢就算
反正九肚魚滑捋捋好過癮呀
平時就食開炸嘅
估唔到蒸嘅都幾好味
然而濕笠笠加滑潺潺又真係冇炸嘅咁多層次
生命中有咩好得過…
同心愛嘅人一齊食嘢？！
仲要係食佢鍾意嘅拉麵～
唐揚炸雞
standard脆口juicy雞，唔會太鹹
但係話時話個炸漿樣有啲似雞記嘅迷你版咁，哈
海老拉麵
對佢嚟講只係okay咋
之前响附近嘅友拉麵嗰隻好食啲喎
（咁又真係出色同驚喜啲嘅賣相仲要靚啲）
個蝦味味到爆線濃郁嘅程度咁
唔係差嘅，只係沒有比較沒有傷害啫
特濃豚骨沾麵
有滿滿嘅料份量十足
肥美帶炭香嘅叉燒煮得又腍又香同筍都一樣唔太鹹
溏心蛋火候啱啱好無嘢好挑剔
麵條粗身較硬（揀硬麵）有麥香好好噍
最緊要係好掛湯啊
沾麵個湯底勁香肉味同魚味
加上有菜嘅甜味所以非常濃郁
比一般豬骨拉麵湯底更鮮甜味美
有啲時候會諗咩嘢食啱佢而我又有得試新嘢
搵間口碑係C/P值高嘅應該冇死掛…
元祖燒牛肉飯
招牌嘅日式燒肉
係似烤肉舖嘅薄片燒肉加汁咁
然後加啲炒椰菜再鋪上飯面
個樣係好茶餐廳or港式日食嗰啲求其飯
不過個味係okay嘅
巨の鰻魚飯（原條）
嘿嘿嘿有鰻魚飯好難唔揀嘅
鰻魚唔算非常厚但都夠滿足程度
蒲燒汁唔會好多，加埋飯鹹甜度平衡
燒雞皮串
呢隻似炸嗰種成塊皮都係脆晒嘅，好香口～
日式麻醬秋葵
無overcooked爽脆唔會太腍
雪得夠凍加埋芝麻香醋食個味唔錯！
呢度啲嘢係簡單啲
賣相都幾茶記
然而味道都算畀足誠意
加上個價又唔貴
都幾值得嚟食（微笑）
