All Posts
愛登士家庭 x Tim Burton
點會唔想睇啊啊啊啊啊？！
Wednesday
即係阿女，佢係主角
係講幫細佬報仇嘅佢要轉校again
今次轉到去爸爸媽媽細個相遇嘅寄宿學校
要適應新生活同查案搵怪物
故事流暢好笑又夠張力
好易就完咗8習喇～
雖然只係頭頭係出自Tim Burton
但係之後嘅色彩都唔算爭好遠
好睇啊佢，超推薦！！！
講男人大肚又有上野樹里
加上廿幾分鐘一集得嗰八集
好難唔去睇，而且係一次過睇完
ヒヤマケンタロウの妊娠（檜山健太郎懷孕了）
改編自坂井恵理嘅同名漫畫
講述主人公桧山健太郎呢個單身工作狂嘅男人有咗
當所有孕婦經歷過嘅呢位先生大部份都感受到
（妊娠嘔咇奶腰痛單身but另一半點都唔想結婚嗰啲package咁）
不過就冇陣痛排出只得劏肚啦
性別換轉又曝咗光
有人覺得終於有人明白；亦有人覺得嘔心
咩都好，陀B又肯生嘅
總會有唔知邊度嚟嘅勇氣㗎喇…
好好追嘅一套劇！
Dopesick
based on 美國記者兼非小說類作家
Beth Macy响2018出版嘅書
《Dopesick: Dealers, Doctors, and the Drug Company That Addicted America》
講述美國對鴉片類藥物成癮嘅地區同經過
主要針對Purdue Pharma嘅OxyContin
點樣收買FDA同DOJ作虛假陳述
用假圖表數據去呃醫生賣藥
以豪華款待令從業員明知隻藥害人都極力推銷
逃恥嘅新年特別篇無理由唔睇嘅…
「逃げるは恥だが役に立つ ガンバレ人類！新春スペシャル！！」
生仔喇佢哋終於
繼續開頭一貫みくり (新垣結衣)腦內小劇場
同平匡 (星野 源)嘅呆呆靦腆樣
由爭取產假做家務等瑣碎事
又係笑吓又感動吓嘅位
而百合 (石田ゆり子) 嗰條支線繼續好正～
後半part係BB出世但係遇上武漢肺炎
冇得見加上人心惶惶嘅生活
學懂珍惜同要學遙距唔接觸嘅日子
太貼地喇實在，依然好好睇無拍爛呢～～～
頂！又忍唔住一口氣睇晒
（雖然攤長睇同慢慢睇要用嘅時間其實係一樣…）
今際の国のアリス
アリス、有栖、Alice响日文都係同樣讀音
唔止嘅，角色裡面好多都係混合咗Alice in Wonderland
而呢度就係東京嘅「平行時空」Borderland
個場景真係一絕，就咁睇都值回票價
睇玩game係要用啲腦
不過都係用角色個腦我睇電視唔關事
後半段交代吓啲人物咁
套劇得8集，好明顯咁正嘅嘢會拍落去
未睇過本身套漫畫所以唔知之後點呀
最吸引梗係山崎賢人啦仲使講
今次爆血勁過Kingdom呀陰功
係喇係喇其他角色都好好睇
總之成套嘢都好睇啦就咁！
因為情節太緊湊 就一次過用兩日煲晒佢
絕對係超！熱！血！青春校園劇（微笑）
雖然係圍繞兩位頭腦好使好用嘅高材生男女（加個唔叻叻嘅援交同學）
不過絕對唔係《輝夜姬想讓人告白》嗰種啦～
有援交有類N號房直播有網上媽媽生(男主)有黑社會有欺凌有爆血形打鬥blablabla…
情節唔複雜議題唔過時最重要係冇一刻拖劇時間
好好睇喎！好難唔推薦呢～
雖然呢套劇係同名漫畫改編
但係我冇睇返本漫畫
反而係睇晒嗰本世界最古早嘅長篇小說：《源氏物語》
套劇係講光源氏流放去須磨（12帖，源氏26歳春-27歳春時期）
但係就穿越咗嚟現代
白食白住唔駛做有女養
幾集後頭中将都過咗嚟仲做埋男公關哈哈
平安時代係個「物哀」（物の哀れ）嘅審美理念
講人話就係咩都感慨吓郁啲意都喊咁啦
而貴族嘛梗係做咩都節奏慢
咁同家陣嘅急速模式當然有好大嘅分別
加埋古人諗到乜都會即席都唱歌吟詩
（唔信咪可參考李白杜甫白居易，唔係佢哋以前求其噏幾句我駛鬼背咁L多嘢）
所以，套劇其實幾好笑
例如平安時代尼姑唔係剃光頭而係剪短髮
光源氏就以為女主係尼姑
女主嫁唔出，光源氏同頭中将問咁你阿爸係咩出身咩職位
又問及識唔識琴棋書畫以明白點解會無人要咁
but千葉雄大啲牙有啲難睇搞到成日出戲
伊藤沙莉，即係以前《女王的教室》嗰個唱K女仔
個樣無變過好易認，係把聲成日都好似喉嚨痛咁幾搞笑
得八集，每集唔駛半粒鐘
輕輕鬆鬆咁咪幾好…
以婚活漫畫嚟改編嘅日劇
一集未到半粒鐘劇情幾輕鬆
仲得嗰八集之嘛，唔難睇得晒啦！
PBS stands for Peanut Butter Sandwich
冇咩意思，只係職員話齋「求其改個名咪改自己鍾意食嘅花生醬三文治」咁囉
一來有伊藤健太郎
二來故事主要講啲以結婚為目標
覺得一睇無妨啊
下面四個係「調查對象」
一個職場好叻所以要搵所謂「普通人」對象其實條線set到好高
一個七年之癢
一個細個好窮因此想要好有錢嘅但係實際上係唔需要
一個直頭係人渣攝石個個搵佢做SP佢又肯喎
仲有第五調查對象嘅，不過唔劇透（嘻）
冇咩嘅，自己覺得幸福咪得囉…
ps, Niki好靚，但係疫症期間唔好唔戴口罩仲周圍去玩啦～
哈！估唔到會睇晒…
改編自貴戸湊太獲得『このミステリーがすごい！』 大賞嘅同名小說：《然後 yuriko就獨自一人了》
講述一個關於「ユリコ様伝説」嘅黯黑系青春校園故事
劇情嘅推進唔錯，完整嘅故事
臨到最後嘅少少反轉有驚喜
八集裡面七集劇情第八集做分析都唔會覺畫出腸
點睇都係覺得做主角嘅玉城ティナ個樣太恐怖
如果只係佢我係唔會開劇睇
（搞到套有伊藤健太郎嘅《惡の華》都唔敢睇）
係見到同主角暴光率一樣高仲係叫百合子嘅岡本夏美先有啲興趣
再見到個樣有啲似黒木華飾演筒見友里子嘅天野はな
就認為一睇無妨
點知最後變成追劇睇哈哈
有時間或者會睇返原著小說
但係近期拜讀緊《源氏物語》
應該有排先可以開新書睇…
同樣係漫畫改編日劇
比起近期好多人睇S系佐藤健嘅《恋はつづくよどこまでも》
都係M系又鬼咁型 x 好樣嘅速水もこみち啱睇啲
完美嘅M型社長配發火便成抖S嘅職員仔
每集半粒鐘好輕鬆又夠搞笑
之前未認識松井愛莉就唔明點解揀呢個人
不過睇劇嗰陣就發現佢身長腳長一米七
著埋高踭鞋配速水個一米八六嘅高度係啱啱好啊
冇睇過本漫畫不過齋睇人設覺得都幾似咁（名取蒼除外）
笑吓咪幾好，反正留响屋企時間多咗可以睇到啲戲呀劇呀動漫kill吓time…
至於佐藤健嘛… 等睇剣心最終章咋～
「許光漢是我的」
因為睇過太多臺灣妹子寫呢句
所以就會一會佢睇吓有咩咁特別
然後，完成咗人生中第一套臺灣劇仲要係偶像(?)劇
話說以前嘅咩流星花園MVP情人惡作劇之吻花樣少年少女我在墾丁天氣晴命中注定我愛你敗犬女王海派甜心我可能不會愛你必娶女人荼蘼通靈少女blablabla全部都係有聽過冇興趣因而無睇過
有諗過因為劉以豪去睇《我們不能是朋友》但真係頂唔順呢啲劇情而放棄
有睇過一兩集《你的孩子不是你的孩子》不過冇睇晒嘅衝動
都有諗過睇《我們與惡的距離》可惜太沉重都係唔想開頭
講返點解睇晒先：故事完整流暢夠張力唔拖劇唔矯情
愛情友情親情穿越查案再帶啲中二同搞笑（十三妹！）
演員表情恰到好處，唔同時空嘅轉換唔突兀
加上剪接做得好唔會睇起上嚟唔識分時空交錯
但最終，我沒有喜歡上許光漢
卻不會否認他演這個角色演得非常好
一口氣睇完13集連彩蛋有啲攰（一集成粒鐘呀大佬）
冇咩我都係去睇返動畫好喇…
有木村拓哉嘅戲就係好睇囉！
劇情係老掉了牙嘅走向啦：
之前身敗名裂過嘅廚師遇上滿腔熱誠想摘星嘅大媽廚師
一齊去努力奮鬥blablabla…
當中梗係每集一難題又哎吔可以解決得到嗰種啦，好熱血嗰種啦
但係木村真係演乜似乜
至少啲法文應該請教過呀Kōki啩聽落都算順耳
嗱～ 除咗睇人當然會因為有好多嘢食睇啦
而且配得木村，個個演員都係重份量
鈴木京香澤村一樹及川光博（表情100分）個個都做得好自然
（啊原來老是常出現嘅玉森裕太被排除）
哈哈哈搵富永愛做木村嘅ex感覺好新奇…
唔錯嘅秋季日劇吖！
