[鰻] 秋香 - 鹽燒白鱔煲仔飯
同我呢種放任式老母唔同
要約3B嘅話，都係得返星期日晏晝
仲要就地方咁先可以同佢隻盈少見面啊！
因為呢間嘢一開門就好快滿座
所以趁啱啱開舖見仲有位即係走入去
嗌咗嘢食就等，先嚟咗碗味噌湯
加咗麩感覺比一般日式食肆更有「誠意」
味道唔錯唔似求其沖嗰啲咁
同3B一齊點可以無酒飲？！
就算只係小酌一杯都要同佢飲
揀咗梅酒，香甜開胃好好味
店家貼心咁畀咗杯冰慢慢加
始終梅酒咁甜唔溝淡吓唔夠凍無咁好味呀
鹽燒白鱔煲仔飯
一行四個大人一個細路一隻B
除咗兩件無幫襯嘅塞豆窿
四個有三個都係嗌呢兜白鱔飯！！！
實不相瞞我哋就係衝住呢個飯而來
每日限量供應喎，咁早嚟到就係為咗佢
白鱔超～ 厚～ 身～ 油花香味道足
非常彈牙嘅肉質一啲腥味都無
個皮又燒得較脆身兼有炭香
飯唔會一舊舊濕笠笠會粒粒分明
攞埋隻全生蛋食唔會過乾
而且煲仔飯嘛，最緊要係個底有飯焦
食得好開心，大大滿足！（thanks 3B，muah～）