All Posts
優雅嘅女性係會响屋企開香薰薰香間屋
為食嘅我係會响屋企開住個爐薰住壽喜燒嘅味道！
日常料理 - 壽喜燒
日常2人前：美國頂級安格斯PRIME雪花肥牛、巴西特級梅肉片、嫩滑雞件
（蔬菜籃）大蔥、娃娃菜、冬菇、粟米、金針菇、靈芝菇
竹輪卷、章魚餅、讚岐烏冬
另加「牛魔拼盤」雪花肥牛同下肩胛翼板
再要隻只係$168嘅原隻開邊青龍蝦400g
同埋炸魚皮、響鈴好豐富
深色係壽喜燒汁，淺色係鰹魚湯底
有人會覺得湯汁太少
但係真係好奇怪啊
明明就係食緊すき焼き壽喜燒
即係一次過薄薄地浸好晒一鑊熟
不過就以為係要食しゃぶしゃぶ涮涮鍋/打邊爐
要一～ 大～ 兜～ 湯汁咁所以先嫌唔夠湯
咁啦，做CS嘅話一般都唔可以窒啲客
唯有下次加多啲湯畀人囉
以我體驗計，呢兩支嘢好夠使～
完全唔需要加外來液體
反正又無得堂食糖水
（政府話6點後啲病毒就會聚晒响餐廳嘛）
壺說 Bla Bla Bla - 芋頭鮮奶（去冰）
咪去啲攝枝筒就飲得嘅嘢囉
報上「走甜」但係就覆我啲芋頭無落糖煮，正！
咁見涼涼地就走冰已經好OK
濃厚芳郁嘅勁香芋頭蓉，已經有足夠嘅香甜
加埋香滑全脂鮮牛奶
痴線！好L好飲啊！！！
無得去臺灣食大甲芋頭就唯有飲返杯嚟慰藉吓心靈啦～
啊～ 天氣又終於涼涼地
可以食啲暖身嘅嘢喇！
平日好少去嘅茶餐廳
不過呢間用有70年歷史嘅前恒貞大押改建
外牆油上超sharp嘅鮮黃食
裡面係極高身樓底感覺好寬敞
加上新簇簇勁乾淨環境舒適
基隆茶餐廳 - 臘味糯米飯 + 蛇羹 set
所以，佢最「茶餐廳」嘅方面
就係大！ 件！ 夾！ 抵！ 食！
抵食都要好食嘅最緊要都係味道
講得「抵食」唔係講「平」就係個分別
個糯米飯夠晒黏，加埋臘味都唔會太鹹好味啊
蛇羹唔係杰撻撻嗰隻
要料有料蛇肉木耳菰絲樣樣足
經過擒晚個聖誕巨餐斧頭扒嘅洗禮…
今日就食返個冇肉懺悔lunch @走肉 ‧ 朋友
因為疫情關係，自助餐改為自選餐 但係有職員喪裝大大兜嘅五餸飯
（好癲呀$55唔使加一仲任添飯啦湯啦糖水同嘢飲）
睇啱就點唔知係咩仲有專人講解
話晒有啲蔬菜簡直係分子料理咁完全睇唔透佢係咩
大隻過個頭嘅碟裝得滿滿咁
兩個人食就可以試多幾款
超香麻辣味嘅四川風麻辣口水雞
啲"雞"彈彈牙咁幾好咬
最正係佢個麻辣味好開胃，超推薦！
勁香蛋味唔會老嘅瑤柱蒸水蛋
瑤柱其實係金菇，咬落爽口嘅
蛋味勁濃又滑滑咁好味呢～
酸酸甜甜甜甜酸酸嘅糖醋排骨
以為係酸齋啲friend實情係酸甜美味嘅爆脆油炸鬼
講開齋，真係有齋：咖喱齋
個咖喱汁好濃麵筋唔會油淋淋咁唔錯唔錯
微苦爽脆嘅豉汁炆涼瓜
新鮮清脆嘅淡淡苦味加埋微鹹豉汁真係啱啱好
涼瓜下面係遮住咗嘅蘿蔔枝竹雞髀菇
唔係人人都可以齊齊整整平平安安咁過聖誕
所以有得做節就幾大都做大佢！！！ 籽樂廚房 - 美國安格斯斧頭扒外賣四人餐
冒住肩周炎（luckily仲未有）嘅風險都要外賣自取
一打開哇！成檯都係嘢好啦都值得托嘅～
廚師精選餐湯
係勁勁勁濃郁嘅番茄濃湯
鮮香酸甜又濃滑而且唔會打散晒番茄啲纖維
完成度超～ 高～
蒜蓉法包
就咁睇係白璽璽咁…
反轉個面就見到塊法包面已經完全被蒜蓉牛油侵占
想搵個白色地方都無
因為家住遙遠嘅山區
個包包焗响個膠盒度會唔脆
唔脆咪用焗爐焗返佢囉（用190度焗幾分鐘之嘛）
邊位焦脆包身爆脆蒜蓉牛油個味直頭飆晒出嚟
配埋個番茄湯簡直就係完美呵呵呵
燒巨型美國安格斯斧頭扒(32oz.)
好！癲！嘅！32安士斧頭扒！！！
好啦即係咁，如果聖誕節食剩嘅係嚡匝匝無嚟味道食到懷疑人生嘅大火雞
點揀都係會揀呢舊食剩留返都仲係美味嘅斧頭扒
冇呀冇呀冇做冬都唔會有堂食呀！
咪去盛記托個迷你溫情盆菜返屋企囉
（好L鍾意個盆菜名）
用錫紙冚住成個盆菜兜
就咁直接用最最最細火加熱15-30分鐘就OK
終於熱喇熱喇，開！蓋！
哇！黐線㗎咁L大兜同我講係2-4人份量？？？
件件都係進擊的巨人嚟㗎？？？
6個人食都夠喎老細…
因為照指示係先影相 再將最上層拎開先食中下層
頂！我孤陋寡聞第一次知道呢個食法
一直都係食最面然後熱情過後
中層到下層啲嘢太鹹又唔吸引就唔再食
所以從來都唔鍾意食盆菜因為覺得好浪費
講吓呢兩層有啲咩先：
新鮮門鱔：外面炸過加埋底啲汁極香
門鱔本身新鮮肉香彈彈牙，好正啊！
咸菜木耳：好啦我唔係咸菜fans
不過佢呢隻咸菜唔會死鹹而木耳一貫嘅爽爽口幾好味
枝竹豆卜：吖～ 啲枝竹唔會硬豆卜索味到麵筋咁款
芹菜土魷：無啦芹菜已經變成湯汁色
土魷味鮮香濃郁，肉料夠新鮮唔會咬唔開呢～
蠔汁豬皮：雖然都係勁索汁但係唔似豆卜咁腍晒
政府認為香港晚上6點後病毒就會聚晒响餐廳喎
Liberty Coffee & Wine
唯有深入虎穴買外賣返屋企播毒啦！
（最緊要係入手咗個粉紅色襟章！！！）
Soup of the day
dinner set裡面嘅例湯
今晚係濃郁味道嘅忌廉蘑菇湯
鮮焗迷你法國牛角包 | mini croissant
嚟Liberty其中一樣最最最吸引嘅就係牛角包
原本諗住就咁另外加兩個原裝size大牛
點知嗌set有得加錢有迷你版
好啦，食住個細嘅先啦～
拎到返老遠嘅屋企都仲係暖
酥脆香軟重牛油味
搞到而家一邊打字個肚咕咕叫呢…
雖然一向麻麻地十十吓
肆人火鍋套餐
不過見終於涼涼地加上要close夜晚堂食
（777又同啲病毒deal咗6點後先出嚟…）
咪就算冒住間屋會成陣邊爐味都要買返個嚟食囉！
理想點’鮮’ 火鍋湯底
其實可以加廿蚊轉熔岩沙嗲湯底、鮮牛油麻辣湯、酸菜湯底
但係佢個蘿蔔清湯腩湯底實在好味到癲
同埋啲配料實在太多
如果再濃啲味食食吓怕會太膩呢～
牛肉
橫膈肌 | 五花趾 | 牛駝峰 | 匙柄 | 美國天然肩胛翼板
西班牙雪花胸肋 | 俄羅斯牛側胸肉
well，食616就係要食靚牛同啲刁鑽部位啊！
襯唔畀夜晚坐低石塘咀前老虎蟹都隊返碗先！
芋圓圓 - 鮮奶椰汁桃膠
又話芋「圓」嘅？方形㗎喎！
不過同台灣嗰啲足料手工一樣咁韌
鮮奶糖水base唔會好甜
桃膠爽爽口咁食落都幾豐富
哈哈，剷埋糖水就終於食飽喇～
限飯令又又又四變二…
買外賣囉唔使嘟碼仲方便～
懶得諗食乜就嗌晒今日食乜春嘅full list
春：小牛仔漢堡扒咖喱飯
軟滑香牛味嘅小牛肉
加埋佢個signature微微辣日式咖喱好好味
夏：脆爆可樂餅咖喱飯
啊！啲可樂餅就算拎返屋企都仲唔會腍晒
外脆內厚厚咁好滿足
配埋咖喱，又係美味之作
秋：神秘蓋澆飯
今日嘅神秘嘢係菇 x 豬肉
肉片入味夠晒香
食菇又爽爽口咁唔錯唔錯
唔止係咖喱先好味呢
冬：生炸鮮魚柳咖喱飯（轉烏冬）
喉咗個烏冬好耐
竟然拎走食都keep得住彈彈牙超~ 正~
魚柳毫無雪味，只得啖啖滑滑魚香
加埋啲沾麵咖喱汁直頭令人風暴吸入
烏冬，真係強烈推薦！
反正落開街就去買埋嘢返公司食…
石磨雞蛋腸粉 | 燒賣 | 鮮磨豆漿
原本諗住嗌豬膶腸
但係唔知係因為隔住口罩講得太細聲（我怕醜嘛）
定係豬膶兩個字根本無出到口
總之結果就得返雞蛋腸
不過咁都幾好彩
腸粉又薄又滑；雞蛋皮薄薄咁幾香蛋味
然後再加個燒賣嘢飲set
燒賣就咁整好一大兜夾出嚟都唔會overcooked
依然彈彈牙唔會成舊粉
豆漿滑滑唔會好甜
所以就話好彩冇咗豬膶
如果唔係一定飽到嘔…
啊！腸粉雖好亦要有佢自家製嘅辣醬香蒜畫龍點睛
仲有燒賣上嘅辣油
美食同調味真係缺一不可！
愉快購物體驗：
「要唔要加豉油辣醬嗰啲？」
「要啊！要辣醬燒賣要辣油」
「咁都要買炸蒜嗰啲」
作為一頭文具控
見到啲咁靚嘅嘢無理由唔開心買走嘅～
別天神 masking tape
Made in Taiwan放心使用
黃底黑字「警告」式語句
記住Never forget Never forgive!
0609 1M‧0616 2M+1‧0721 YL‧0831 PE
貼車唔得咁唯有周圍周圍周圍貼啦～～～
