All Posts
本身心情一般，走落樓諗住買燒賣皇后試吓
點知閂半閘話整緊無咁快
唯有過隔離買腸粉啦～
石磨豬膶腸粉加雞蛋
上次食唔到，今次終於食到
仲係好好味嗰隻
「唔該想要豬膶腸粉加燒賣」
「燒賣未返貨呀，不如加餸？」
（吖～ 今日冇燒賣日呀？）
「咁加雞蛋啦，我畀個盒你…」
「我响你啲腸粉度加咗料」 「唔？」
「加咗我嘅心意」
「XDDD」
「仲加多少少豬膶」
「哇你唔單止靚仔，仲好有心肝」（心）
結論就係：心情麻麻就落鳳鳴買腸粉啦！
點知返到去收到全宇宙最索條腿仲要長過我個人嘅同事個message
話買咗燒賣皇后返嚟開心些牙
係原味日日手工包嘅冬菇豬肉燒賣
雖然佢哋嘅燒賣係黃色嘅
但係當然唔可以唔畀佢哋隻辣椒染紅
哈哈，個味係鮮嘅
不過我本身係唔鍾意食豬肉燒賣
難得一個成日話食乜都冇所謂嘅人終於有嘢想食…
咁我當然會奉陪到底～
响啲雞同啤酒都未嚟前就放低
幾好吖～ 兩樣都好好食
咩都未有之前就已經輕鬆清ed
NENE CHICKEN - 韓式甜辣炸雞 | 初雪炸雞
明明嗌「有骨落地」嘅但嚟咗無骨版
是但啦當食得優雅啲囉
甜辣醬係比較穩陣嘅款色
味道當然係甜中帶微辣，雞件juicy炸得唔錯
而初雪就係極微細嘅芝士粉舖面
香甜乾身得嚟漏漏地
相對於芝士嘅鹹；佢就係甜味重啲
試吓係OK嘅，不過會係啲試一次就夠啦唔該嗰種
啤酒死都唔會再揀CASS
好彩都仲有1664，哈～
又要冒住燻到成間屋都係羊 x 南乳味
見天氣有少少涼又托佢返去開心share啦～
盛記 羊腩煲
食落都幾多件羊肉
要皮有皮要肉有肉要筋有筋最緊要有骨落地
湯汁濃郁又唔會極鹹
羊肉夠香濃但太新鮮喇冇羶味
蓮藕爽脆馬蹄更爽冬菇又大大隻厚厚身咁
枝竹炸得好夠晒索湯生菜仲係勁新鮮
食完成身都好暖
瓹返入被竇就啱啱好…
發呆中嘅我望住menu
「有冇話想飲有奶定無奶？」
「冇」
「Americano?」
「怕太淡」
「咁Long Black?」
「好喎！要一杯唔該」
其實Americano同Long Black都係Espresso加水組合
就係先後次序唔同，咖啡嘅風味都唔同
豆脂嘅香氣都得以保留啊～
今日隻豆帶微酸，同心情差唔多
只不過係三個大男孩逼响個counter仔度
然後又有兩個會突然接龍唱twins
過一陣又响度試拉花
齋望佢哋其實都幾chill
最衰係疫情啦
佢哋明明有瓷杯但出貨就要用紙杯…
coffe, tea or …?
抹茶咖啡
why not both?
相對叫佢「抹茶咖啡」
佢應該較適合稱為「咖啡抹茶」
用嘅係日本老字號丸安茶葉
個抹茶味香濃到爆炸
咖啡就只剩番微微嘅香味，輸晒喇
唔需要落糖，因為甘苦味超醇厚
再加任何嘢都會破壞晒…
煙燻朱古力
入落樽度因為佢係分子料理
一打開就飄緊啲煙出嚟
（影得唔係幾好，是L但啦）
個煙燻木味幾香喎
係嘅咁朱古力就係普通牛奶朱力
唔算超甜可以飲
但堅係玩味十足咁囉～
作為一枚機迷
一路食嘢一路望住部嘢
要走嘅始終都係要走？
要酒嘅始終都係要酒！
唔需要飛機餐喇
一杯stout就夠，唔該晒…
政府唔畀返學但係我點都要見吓班長㗎喇（握拳）
程班長台灣美食
程班長紅燒三寶麵
紅燒牛肉麵底裡面有齊牛筋、肉、肚三寶
炆得超～腍，一咬就斷開無攝渣
湯汁濃唔太帶藥材味
厚身粗寬版麵條夠韌性足好好咬呢！
程班長牛肉便當
我真係好L掛住台鐵便當呀（吶喊）
食住呢兜頂住檔先
雖然佢個樣真係好衰
不過係好好食嘅
牛肉係紅燒牛肉麵走麵 x 湯汁濃縮版
蒜蓉炒菜新鮮爽脆仲勁大兜
甜不辣魚肉味重又甜甜咁唔錯唔錯
紅色假魷魚配菜彈彈牙好送飯
就連隻本身唔鍾意全熟蛋嘅我都被隻蛋個鹵汁味一嘢啪入口
白飯香糯軟熟滿滿米味，成兜嘢完成度好高～
萬巒豬腳冷盤
豬腳肉爽滑，鹵汁唔會好鹹連鹹菜都唔會好鹹
酸梅汁
平唔互搶嘅酸味同甜味
美味兼解渴呢
好negative咁將DNA送中
結果係negative就出返去食嘢
黑松露慢煮安格斯牛沾麵
黑松露就係味道好搶
不過啲牛肉大大塊又腍身
就唔會畀菇食晒成兜嘢個味
麵條爽滑彈牙夠掛湯，好好食呢～
個沾麵汁骨湯味奶白味道濃郁
仲有隻帆立貝响裡面，駛唔駛咁足料呀？
海老帆立貝沾麵
碗麵啲料都多成個碗蓋咁 海鮮們帶住絕頂鮮甜嘅味道
沾麵湯汁係滿滿櫻花蝦sss
其實响牛肉沾麵同佢之間真係好難揀，全部食晒就最好～
特濃豚骨沾麵
唔沾沾吓爆濃香豬骨湯麵都好好食
鹽味雞湯拉麵
要清嘅仲有呢種
日式煎餃子
拉麵嘅好朋友，話煎啫其實係氣炸鍋炸嘅
唔會油膩膩咁都唔錯嘅
吉列芝士蝦球
但小食之最一定定定係呢個芝士蝦波波！！！
彈牙蝦球裡面係流心芝士
正到暈啊！食幾多粒都唔會夠喉呢哈哈哈～～～
近期換咗隻新香水
其實好多年前已經想買佢
但係當其時响啲格仔舖見過一次就冇特別幫襯到
不過居然阿布泰有售仲要好平
好啦好啦，轉吓新味道啦咁～
JAPARA Hatshepsut Story Perfume Oil
好似字典嘅包裝
畫住埃及嘢，因為個品牌係話用古埃及配方調製
而且每隻味都係同埃及神話呀女神有關
ฮัตเซปซุต
個樽簡直係奢華兼浮誇
啊！介紹返Hatshepsut (約前1508年－前1458年1月16日)
响古埃及語嘅意思為「最高貴的女士」
佢係第十八王朝法老 (約公元前1479年－約公元前1458年在位)
亦係古埃及第二位女法老王
係位古埃及一位著名的女法老
前調 : 保加利亞玫瑰、茉莉、牡丹
經過舖頭畀佢個超香甜吸咗入去呀呀呀…
Joyful Dessert House
好啦，嘆返個好sweet嘅下午茶啦～
燒菠蘿雪葩 | Sorbet with Grilled Pineapple
一整片大大塊焦糖菠蘿片
下面係勁大兜新鮮清甜菠蘿雪葩
雪葩打得幼滑，係呢個日子猛咁隊冰食到打冷震啫 XDDD
芒果拿破崙 | Napoleon Mango
痴線㗎！棟樓hola高大啊啊啊！
芒果鮮甜cream香滑酥皮爆鬆脆
主角之外配角都唔嘢少
球芒果雪糕勁香甜
令本身係cream + 芒果粒嘅拿破崙更添芒果味，勁正！！！
得閒就去飲茶先～～～
徐記廚房點心
搬咗新舖地方乾淨又闊落
徐記蝦餃皇
飽飽滿蝦肉爽口皮唔太厚又夠煙韌，正！
蟹子燒賣皇
其實我本身麻麻地豬肉燒賣
but小不點極推薦咪食囉
個味唔錯，塊皮冇鹼水味
豬肉同蝦都唔霉
亦唔會溝埋變成堆唔知咩味咁都唔錯
健康布拉腸
蒸腸粉爽滑唔會overcooked
勁香米味，加少少豉油就已經好好食
黃金魚餅
魚餅即叫即煎熱辣辣
呢隻有餃子皮包住，外層煎得脆脆
裡面啲鯪魚肉彈彈牙咁好好食
煎釀虎皮尖椒
食尖椒啊真係好講運氣
唔辣又食得唔夠過癮 幸運地食到隻辣嘅
又驚自己唔太食得辣好矛盾
不過隻椒本身清爽就好
係少少嫌啲釀魚肉唔到飽滿啫
踏入新嘅一年都係要食「蠔」啲
但原來要猛食蠔都係唔使食得好豪…
唔想點諗就嗌set
因為唔太肚餓就嗌12隻全蠔set（雖然好想嗌）
食生冷嘢都係會飲酒
呢杯house wine甜甜地少少乾身唔錯啊，cheers！
menu自選6隻生蠔
舖頭每日新鮮返貨，店員會講有咩有貨無貨
兩隻爽甜美國Blue Point
兩隻蠔味濃郁帶creamy嘅Westcott Pacific
勁大隻嘅美國Astoria Jumbo
同隻鮮甜超濃蠔味嘅法國Eske
Astoria Jumbo真係好Jumbo，呵呵～
Caesar Salad
除咗啲蠔好新鮮，啲菜都係新鮮爽脆嘅
Carbonara
諗住唔食全生冷嘢先嗌呢個set
食完蠔諗住食唔落嘅話意粉會打包
然而食完蠔係飽嘅
