[點心] 徐記廚房點心
得閒就去飲茶先～～～
徐記廚房點心
搬咗新舖地方乾淨又闊落
徐記蝦餃皇
飽飽滿蝦肉爽口皮唔太厚又夠煙韌，正！
蟹子燒賣皇
其實我本身麻麻地豬肉燒賣
but小不點極推薦咪食囉
個味唔錯，塊皮冇鹼水味
豬肉同蝦都唔霉
亦唔會溝埋變成堆唔知咩味咁都唔錯
健康布拉腸
蒸腸粉爽滑唔會overcooked
勁香米味，加少少豉油就已經好好食
黃金魚餅
魚餅即叫即煎熱辣辣
呢隻有餃子皮包住，外層煎得脆脆
裡面啲鯪魚肉彈彈牙咁好好食
煎釀虎皮尖椒
食尖椒啊真係好講運氣
唔辣又食得唔夠過癮
幸運地食到隻辣嘅
又驚自己唔太食得辣好矛盾
不過隻椒本身清爽就好
係少少嫌啲釀魚肉唔到飽滿啫
古法蛋散
隱藏menu之蛋散
因為點心紙裡面無嘅
然而呢樣都係碰運氣食物之一
味道係好嘅，蜜糖仲要爆多非常sweet
三舊裡面有一件超～ 鬆、一件OK鬆、一件唔夠鬆呀 TT
唔完美可接受希望下次做得好啲
啊！特別要推介呢度嘅鎮店之寶：徐媽媽
親和力極強人又nice
（員工們都好有禮貌）
令到成個用餐過程都好愉快呢～