[犇] 籽樂廚房 - X’mas巨餐32oz.斧頭扒

唔係人人都可以齊齊整整平平安安咁過聖誕
所以有得做節就幾大都做大佢！！！　　

籽樂廚房 - 美國安格斯斧頭扒外賣四人餐
冒住肩周炎（luckily仲未有）嘅風險都要外賣自取
一打開哇！成檯都係嘢好啦都值得托嘅～

廚師精選餐湯
係勁勁勁濃郁嘅番茄濃湯
鮮香酸甜又濃滑而且唔會打散晒番茄啲纖維
完成度超～ 高～

蒜蓉法包
就咁睇係白璽璽咁…

反轉個面就見到塊法包面已經完全被蒜蓉牛油侵占
想搵個白色地方都無

因為家住遙遠嘅山區
個包包焗响個膠盒度會唔脆
唔脆咪用焗爐焗返佢囉（用190度焗幾分鐘之嘛）
邊位焦脆包身爆脆蒜蓉牛油個味直頭飆晒出嚟
配埋個番茄湯簡直就係完美呵呵呵

燒巨型美國安格斯斧頭扒(32oz.)
好！癲！嘅！32安士斧頭扒！！！
好啦即係咁，如果聖誕節食剩嘅係嚡匝匝無嚟味道食到懷疑人生嘅大火雞
點揀都係會揀呢舊食剩留返都仲係美味嘅斧頭扒

32oz.嘅比例
成隻拎上手都覺得攰哈哈
（所以我都唔知係哪來的氣力將成個餐就咁托返屋企，仲係坐公共交通工具嗰隻…）

大還大，個扒嘅肉質係極之嫩
只係用屋企啲19餐刀都切得開咁樣
睇到舊肉就知唔係因為脂肪多所以好切
擺明就係肉嫩加上個火喉啱啱好
個肉味非常香濃，連埋個濃郁微辣嘅肉汁
真係好正呢～～～

扒底嘅small potatoes
係啦佢哋畀件扒遮住咗好遲先見到

加勒比海飛魚籽煙三文魚白酒忌廉汁意粉
根據多次外賣意粉嘅經驗
今舖醒水喇識落order叫唔好煮咁熟
焗到返屋企就差唔多
終於無太腍同overcooked喇喇喇（撒花）
係整體微腍可吃嘅地步
味道好好，鮮鹹香嘅煙三文魚同飛魚籽
魚籽又令意粉增添爽口感覺
裡面爆多菇菇們，成兜好平衡唔會死鹹好食啊！

黑松露野菌意大利飯
陣菇味已經濃同多度以為自己身處菇田
不過減除返一切草青菇腥味
飯入面唔會腍，係真正risotto口味

扒又好意粉又好飯都好
每樣都各自各美味
無話邊隻好食啲堅係無一樣食物會被比下去
（包括埋湯細件如法包都係）
令人唔可以唔驚嘆廚師們嘅用心

士多啤梨泡芙
甜品啦，仲有幾罐唔飲嘅汽水
拎可樂啊睇吓有無機會煮雞翼

張心意card係餐廳送嘅
超有heart（大大心）
話說呢間係社企餐廳
有招聘失聰同弱聽嘅員工
見都黑tee嘅就係
但係唔係為咗特顯
只係知道就咁嗌就唔會聽到
唔好誤會係叫極都唔應

然而我都有自己拎返張
咁鬼靚唔係唔拎嚟周圍貼四圍派呀嘛？？？