[素] 走肉 ‧ 朋友 - 全日走肉五餸餐

經過擒晚個聖誕巨餐斧頭扒嘅洗禮…

今日就食返個冇肉懺悔lunch @走肉 ‧ 朋友

因為疫情關係，自助餐改為自選餐
但係有職員喪裝大大兜嘅五餸飯
（好癲呀$55唔使加一仲任添飯啦湯啦糖水同嘢飲）

睇啱就點唔知係咩仲有專人講解
話晒有啲蔬菜簡直係分子料理咁完全睇唔透佢係咩

大隻過個頭嘅碟裝得滿滿咁

兩個人食就可以試多幾款

超香麻辣味嘅四川風麻辣口水雞
啲"雞"彈彈牙咁幾好咬
最正係佢個麻辣味好開胃，超推薦！

勁香蛋味唔會老嘅瑤柱蒸水蛋
瑤柱其實係金菇，咬落爽口嘅
蛋味勁濃又滑滑咁好味呢～

酸酸甜甜甜甜酸酸嘅糖醋排骨
以為係酸齋啲friend實情係酸甜美味嘅爆脆油炸鬼

講開齋，真係有齋：咖喱齋
個咖喱汁好濃麵筋唔會油淋淋咁唔錯唔錯

微苦爽脆嘅豉汁炆涼瓜
新鮮清脆嘅淡淡苦味加埋微鹹豉汁真係啱啱好
涼瓜下面係遮住咗嘅蘿蔔枝竹雞髀菇
啲蘿蔔又甜煮得超軟身好好食啊！

唔輸蝕比有臘味嗰種嘅清蒸粗絲蘿蔔糕
唔會成舊粉咁再加粗條蘿蔔同調味醬油
新年懶得整都可以考慮買返底喎…

唯一一樣兩碟都會有嘅西檸汁芋頭魚
芋頭勁香食落直頭漿口好揀手
個西檸汁嘅酸味完全係令人上癮嘅美味，太正喇！

雜錦脆脆（豆腐蓮藕蕃薯）
全部都係椒鹽味，外層都係脆嘅
豆腐係脫水版硬身少少嗰隻
所以椒鹽豆腐嘛點都係無得輸
蓮藕爽脆，但係就咁一塊食無咩味加埋椒鹽就啱啱好
蕃薯係超～ 甜～ 嘅黃心番薯
連埋椒鹽就更突顯佢個隻甜，超讚！

白飯係任裝嘅，話係白飯裡面係有粒粒紅米
隻米幾香飯味喎，搞到要食咁多餸都仲猛咁扒飯

湯都係任裝嘅，今日係蓮藕豆湯
湯料有蓮藕甘筍粟米嗰啲加埋豆就好清甜
無肉湯骨湯咁油膩

哎吔吔，諗住食清啲懺悔吓不過點睇又係會食到飽撐撐
（食物全！清！唔浪費食物㗎我！）

嘢飲又又係任斟
有當然地嘅熱水之餘
亦有檸檬水呢杯消滯普洱同清熱五花茶
不過呢杯茶唔係我嘅我會飲多碗湯

食咗咁多嘢但係都仲會吔埋陳皮紅豆沙
啊！糖水，都係任裝嘅
食得晒先好拎呀吓

啲豆煲到離晒殼起晒沙
味道唔會好甜，紅豆味（大心）

食完自己執碗啊！

平日好少會食呢種碟頭飯幾餸飯咁樣形式嘅嘢
然而味道好好完全值得嚟試
呢度啲素食食完唔會似食齋咁食到飽飽滯滯
唔滯啫but真係好L飽
仲諗住擒晚食得咁甘今日唔好咁放縱㗎嘛
媽我錯喇～ 食素都飽到上天靈蓋

未拆禮物之前已經要拆褲頭
好在今日着橡筋頭㗎啫…