[粵] 盛記盆菜 - 迷你溫情盆菜
冇呀冇呀冇做冬都唔會有堂食呀！
咪去盛記托個迷你溫情盆菜返屋企囉
（好L鍾意個盆菜名）
用錫紙冚住成個盆菜兜
就咁直接用最最最細火加熱15-30分鐘就OK
終於熱喇熱喇，開！蓋！
哇！黐線㗎咁L大兜同我講係2-4人份量？？？
件件都係進擊的巨人嚟㗎？？？
6個人食都夠喎老細…
因為照指示係先影相 再將最上層拎開先食中下層
頂！我孤陋寡聞第一次知道呢個食法
一直都係食最面然後熱情過後
中層到下層啲嘢太鹹又唔吸引就唔再食
所以從來都唔鍾意食盆菜因為覺得好浪費
講吓呢兩層有啲咩先：
新鮮門鱔：外面炸過加埋底啲汁極香
門鱔本身新鮮肉香彈彈牙，好正啊！
咸菜木耳：好啦我唔係咸菜fans
不過佢呢隻咸菜唔會死鹹而木耳一貫嘅爽爽口幾好味
枝竹豆卜：吖～ 啲枝竹唔會硬豆卜索味到麵筋咁款
芹菜土魷：無啦芹菜已經變成湯汁色
土魷味鮮香濃郁，肉料夠新鮮唔會咬唔開呢～
蠔汁豬皮：雖然都係勁索汁但係唔似豆卜咁腍晒
大塊又爽口食得好開懷
荷香蓮片：早啲食就爽脆；煮耐啲就極腍嘅蓮藕片
酥炸荔芋：炸咗就唔會炆到爛晒嘅芋頭
舊芋頭勁靚裡面仲帶微微粉呀
清甜蘿蔔、高湯津白：食材甜、外層索鹹湯汁好平衡
爽滑馬蹄：well，呢啲爽甜寶物見到當然會一粒接一粒接一粒瘋狂啪入口
精製鯪魚球：好好好彈牙又香魚味呢！
介紹返：頂峰位置係發財好市即係髮菜蠔豉
啲蠔好濃味髮菜軟軟滑滑
啡色系仲有肉汁燴北菇：勁厚肉嘅北菇炆得腍身好好咬
同圍村腩肉：五層肥瘦分明嘅五花腩
肉香唔會肥漏漏咁好美味啊！
唔會漏咗清翠綠色嘅碧綠西蘭花
新鮮無草青味，食食吓拎嚟同湯汁一齊煮就已經夠晒味
乾煎大蝦
以為平平地2-4人盆菜得兩隻蝦會好正常
點知係4！大！隻！
蝦肉勁新鮮仲要蝦頭有膏
煮汁係甜甜口味
哎吔，咪以為盆菜只係全部同一隻味啦好無？
古法白切雞
呢隻雞真係唔講得笑
皮香滑裡面唔係夾脂肪肥雞
所以雞肉味勁香
雞有雞味之餘肉質嫩滑
好L好味呀你老味（古法嘛咪老味囉）
明爐大鴨
鴨肉味道梗係比雞肉濃好多
佢仲要整得再爆香幾倍
加上啲肉又唔會乾嚡柴好好食呢～
就算一直用最細火
煮煮吓都會收汁
個蠔油base湯汁味道會幾濃
响呢個時候加啲滾水就可以
不過唔需要加太多啦又唔係打邊爐
哎吔吔然而份量都係太太太多
食到好飽飽仲要留返啲之後又食過喇（嗝～）
冬至快樂，最緊要齊齊整整
一個都不能少！