All Posts
佢鍾意米線我就覺得麻麻
我鍾意熱氣嘢佢就係沙律lover
然而，我哋都好鍾意去飲茶
（同埋食拉麵仲有漢堡包blablabla…）
晶瑩鮮蝦餃
去邊間茶樓都好
係咪都會叫返籠蝦餃
呢間本身做牛嘅就無預計整得非常好
不過都叫standard以上嘅
至少，又大隻啲餡又新鮮
係層皮再韌多少少就perfect池喇
粟米煎牛餅
嘿嘿嘿！點都會嗌煎炸嘢嘅
今次留手喇只係叫呢樣
手打牛肉餅味道香又帶筋嘅韌性
有粟米晌裡面食落爽爽地
個脆炸雲吞皮卜卜脆無油臆味
好好食呀！！！
鮮肉灌湯小籠包
嗱～ 雖然呢間係食牛嘅牛嘅
但係我哋見到小籠包呢樣嘢又忍唔住會點
冇話做到啲咩名店咁啲皮好Q薄
都係家庭式手工貨嗰種
唔錯嘅都算係…
佢又又又陪去產檢嘅日子
當然想同佢食返餐好
熱死辣辣梗係去隊返碗丼最happy
唔敢再去日本野又同過佢去鉄火堂喇
吖！諗到去呢間會想翻啅嘅丼屋，gogogo～
叫咩丼都好都會有味噌湯
standard嘢啦…
跟set會有沙律一齊
另外又會好鍾意嘅中華沙律
口味呢家嘢好幾搞笑
竟然世界上有人係呢隻海藻嘅死忠派
大勝丼 咩都有咩都有刺身爆滿丼（大心）
有牡丹蝦兩隻、蟹肉、海膽、炙燒穴子、
帶子、吞拿魚、油甘魚、三文魚籽…
…揭一揭仲見到八爪魚、醋鯖魚同三文魚
哈哈！食食吓見到匿埋咗嘅北寄貝
咪講笑，睇都睇得出啲刺身們有幾新鮮
啲海膽仲要係極味濃嗰隻
牡丹蝦同帶子都係漿口貨色
蟹肉鮮甜，醋鯖魚另成碗嘢唔太漏，正！
飯底有得揀白醋飯同赤醋飯
係隻醋有少少唔同味咁解
而個飯都唔係就咁醋飯that’s all
第一次响荃灣嗰間見無人就入去試吓
不過之後幾次都係去咗深井食
唔係好味而係個份量大啲加上唔使等位
下午茶個量就似一般茶記午餐咁
正餐就似兩個人先食得晒咁
星洲炒米
唔夠香辣亦都唔夠乾身 咪普通少少香料嘅炒米粉咁
經典豬扒包配薯角
豬扒juicy個包上枱都係熱辣辣嘅
係沙律醬唔係千島醬，真好！
涼瓜牛肉飯
涼瓜爽口唔苦，無咩涼瓜嘅特色
牛肉都唔入味呀
一般般嘅碟頭飯咁囉
叉燒炒蛋飯
份！量！好！巨！形！
啲蛋唔使錢咁鬼咁多
味道就okay嘅，蛋都係滑叉燒都腍身咁啦
生滾沙牛窩蛋麵
哈哈個樣好嘔心
唔係出色嘅沙爹牛
係就係熱辣辣不過啲麵就搞到「煮」淋晒
食到後期成pat嘢咁…
芝腿西多士
等到頸都長先等到有姐姐
可惜佢要返菲律賓喇
出咗糧畀佢諗住同佢出街食吓嘢
竟然佢仲豪氣過我要請我食
嗱！我哋要食梗係食Jollibee啦 XDDD
佢仲自己拍板話食菲律賓式點餐
辣雞就必須嘅，Jollibee炸雞當然係配蘑菇gravy
蕃薯條係我鍾意嘅嘢
畢竟食熱氣嘢食到極致真係幾開心
黑牛啦～ 係雪糕加可樂個底仲有朱古力漿
姐姐話食Jollibee嘢飲係要揀呢樣㗎
佢就冇咁熱氣，揀返正港菲式口味嘅意粉
啊！仲有呢個好彩細個掌心嘅mango peach pie
因為個炸pie裡面好鬼甜（笑）
阿姐姐話有時間叫我同阿B去佢度（菲律賓）住到想走先走
就算係咪客套說話都好，多謝晒佢先～～～
今日我大晒嘅日子
佢話我鍾意食乜就同我去！！！
梗係想試吓响晏晝就食串燒啦，嘿嘿～
仲要豪食咁話唔要叫set，散嗌見到咩想要就叫！
汁燒香蔥牛肉卷
薄牛肉卷好乾身
所以有汁同啲外乾內爽嘅蔥墊埋係好重要
岩鹽串燒牛舌
牛脷呢家嘢係咪都會嗌㗎啦！
面頭乾身裡面因為唔太厚都叫有剩返啲肉汁咁
都滲唔少牛嘅香味嘅，算係咁啦都
汁燒鰻魚串
鰻魚鰻魚鰻魚啦啦啦
個蒲燒汁鹹甜度適中魚肉本身較肥膩
不過呢樣嘢都唔容易整得難食嘅
芥末餃子
wasabi香氣令呢隻肉餃子變得特別（啲）
不過個餃子皮都幾厚吓
同埋個底如果煎得再燶啲就好喇…
蟹皇醬蒜香燒北海道元貝
元貝唔會燒到全乾身食得出個鮮味，good～
蒜味道幾突出
個蟹皇醬個味又夠濃郁
可惜搞到蟹皇醬or調味蒜蓉其中一樣over咗
特色三文魚腩
就咁同佢食容易揀嘢
一再多啲人就弊
呢個唔食呢樣嗰樣
嗰個又話唔肚餓唔好嗌咁多
好啦咁，最後個份量變得…
同佢平日我哋兩個食得晒嘅份量差唔多 XDDD
醬滷拼盆
一次過食墨魚、紅腸、豬耳、豬腩肉、溏心蛋、韭菜同豆腐
無一般潮州老舖咁死鹹
不過又講唔出有咩特別驚艷之處咁
（可能因為有我唔食嘅紅腸啩）
椒鹽孖寶一口方塊
鹹嘅椒鹽豆腐 x 加煉奶就甜嘅炸饅頭
香口嘢，正！
最正係啲炸蒜粒
所以饅頭鹹甜食都可以
冬菜粉絲蒸九肚魚
好啦個個都話自己熱氣咪揀一碟炸嘢就算
反正九肚魚滑捋捋好過癮呀
平時就食開炸嘅
估唔到蒸嘅都幾好味
然而濕笠笠加滑潺潺又真係冇炸嘅咁多層次
生命中有咩好得過…
同心愛嘅人一齊食嘢？！
仲要係食佢鍾意嘅拉麵～
唐揚炸雞
standard脆口juicy雞，唔會太鹹
但係話時話個炸漿樣有啲似雞記嘅迷你版咁，哈
海老拉麵
對佢嚟講只係okay咋
之前响附近嘅友拉麵嗰隻好食啲喎
（咁又真係出色同驚喜啲嘅賣相仲要靚啲）
個蝦味味到爆線濃郁嘅程度咁
唔係差嘅，只係沒有比較沒有傷害啫
特濃豚骨沾麵
有滿滿嘅料份量十足
肥美帶炭香嘅叉燒煮得又腍又香同筍都一樣唔太鹹
溏心蛋火候啱啱好無嘢好挑剔
麵條粗身較硬（揀硬麵）有麥香好好噍
最緊要係好掛湯啊
沾麵個湯底勁香肉味同魚味
加上有菜嘅甜味所以非常濃郁
比一般豬骨拉麵湯底更鮮甜味美
有啲時候會諗咩嘢食啱佢而我又有得試新嘢
搵間口碑係C/P值高嘅應該冇死掛…
元祖燒牛肉飯
招牌嘅日式燒肉
係似烤肉舖嘅薄片燒肉加汁咁
然後加啲炒椰菜再鋪上飯面
個樣係好茶餐廳or港式日食嗰啲求其飯
不過個味係okay嘅
巨の鰻魚飯（原條）
嘿嘿嘿有鰻魚飯好難唔揀嘅
鰻魚唔算非常厚但都夠滿足程度
蒲燒汁唔會好多，加埋飯鹹甜度平衡
燒雞皮串
呢隻似炸嗰種成塊皮都係脆晒嘅，好香口～
日式麻醬秋葵
無overcooked爽脆唔會太腍
雪得夠凍加埋芝麻香醋食個味唔錯！
呢度啲嘢係簡單啲
賣相都幾茶記
然而味道都算畀足誠意
加上個價又唔貴
都幾值得嚟食（微笑）
同個好鍾意好鍾意嘅男人配咗種
得出嚟件人仔就算想同唔想都變成佔據生活嘅大部份
由陀住完全無咩感覺
（因為無唔舒服肚又唔大係佢踢踢吓嗰陣幾過癮）
到醫生拎佢出嚟要觀察
新手阿媽連抱都唔識抱咩都知
無長老幫就同佢兩個响度日夜打大佬
出街唔會喊；响屋企就成日喊喊喊喊喊 TT
帶佢打針喊得一聲
之後check呢樣嗰樣又平安無事
叫佢識聽大聲可以嚇到佢
學識翻身周圍爬四圍擒高擒低
爬得快到睇漏眼都追唔切
邊個開門就笑住爬去邊個度
搞搞震手腳又快拎呢樣嗰樣仲咩都擺入口
等呀等，終於出到兩隻牙仔
會食固體但係姐姐餵嘅話會搞到由頭到腳都係
（等咗好多個月先終於再有人幫手 T-T）
去到而家會對住我叫「maa～」（抱緊）
仲惹到武肺發高燒終於試到第一次病咗辛苦辛苦陰功豬
因為係佢，明知條路難行都先試吓
亦因為係佢，隻小朋友先有機會嚟到呢個世界
而佢都照顧咗我好多好多
雖然佢次次食完都會痾
但係又話好好食
好啦！跟吓去試佢鍾意嘅味道先…
自選小鍋米線
裡面加咗炸醬豬腸腩肉腐竹
一睇就知係辣嘅不過唔係大辣啦
香嘅，一入口試個湯已經辣到我叫救命
好在碗嘢唔係我嘅
自選小鍋薯粉
係嘅，就算想嘗試融入佢嘅口味
始終自己有啲嘢都係想去返comfort zone
唔鍾意食辣唔鍾意食米線唔鍾意要好似車仔麵咁揀餸
我真係落入咗個奇怪嘅地方
要揀米線都係會揀薯粉，好咬啲嘛
諗唔到餸就食雲吞同腐竹
食唔到辣就揀小小辣
搞到碗嘢睇落唔太開胃不過其實個味同雲吞都好食
係雲吞加薯粉呢個組合實在會太full
因為本身碗嘢好大
食唔晒喇今次…
食粉麵配豆漿最正常啦
加上咁辣點可以唔對返支啊？！
口味唔夾㖭，不過我冇食到痾啊哈哈哈～～～
畫公仔 x 估已經夠爆笑
比Pictionary更爆笑仲有呢副！
Telestration 傳情畫意
就係畫公仔 x 估 x 以訛傳訛（哈哈哈）
要夠多人先好玩
一個畫下一個估寫低啲字然後再一個畫blablabla
通常就係得出嚟嘅謎底 x 謎面 = 好搞笑
玩呢副嘢最正嘅係：呢個遊戲唔存在贏輸
純玩夠開心咁先係一班人玩遊戲嘅最高境界啊！
真心好玩，晌tough days中保持笑容真係好重要～
又係一齊去產檢嘅日子
去之前排個短隊（幾個人响前面）食碗拉麵先…
裝修係魚場屋台風
加上海量嘅漫畫牆身
日系童趣感十足
而呢度嘅另一特色梗係個麵量
係其他一般拉麵店嘅份量1.5倍
C/P值高都係一大賣點喔！
魚介豚骨蕃茄海蝦味沾麵
呢間舖12:00－15:30只提供沾麵
去到晚市17:30－22:30就剩係有拉麵
台風最最最signature就係魚介豚骨湯底
兩碗沾麵個沾麵湯都係以呢個做base
紅色呢碗係爆香豬魚味加茄味同蝦味，勁鮮甜呢～
魚介豚骨焙煎黑芝麻沾麵
黑擝擝就有呢兜黑芝麻嘅
已經夠晒香嘅魚介豚骨湯底
再添爆香濃味嘅焙煎黑芝麻晌裡面
濃到痴線，仲要勁掛麵… 好漏呀頂！
食呢碗沾麵記住响食完之後
叫職員加湯落沾麵湯度再轟埋佢
麵多，配料都唔少㗎
搞到送完碗麵都仲有好多繼續食食食
\每日限賣30碗/ 沾麵
