All Posts
平日較鍾意泰式海南雞
不過新加坡式嘅間唔時食吓都幾好
天天海南雞
寫例牌但係超大份
雞唔肥，雞皮薄薄皮肉之間無肥膏
肉香滑唔乾柴又夠雞味
配埋特色辣醬非常夾
平日鍾意點點醬油膏嘅我都一秒轉軚
雖然應該會更相輝映但都冇嗌油飯
好啦！搵日lunch嘅時候再試吓
酒糟四寶
細細聲講，我覺得呢兜嘢比海南雞更！出！色！
有醉雞翼雞尖雞腳雞腎雞膶
樣樣都勁足花雕味
酒味濃郁又唔鹹之餘仲要勁入味
太好食喇實在，超讚！！！
鹽磚和牛
响佢同牛骨茶之間揀
侍應哥哥話茶會漏啲同埋呢碟受歡迎啲
不過其實啲牛都幾多吓，好飽呀
和牛軟滑切細粒，上面爆多木魚碎咬落脆身帶微微魚香
牛肉底有炸紫菜同軟牛肉好夾
本身已經夠味不過都會沾少少下面塊粉紅岩鹽版
送飯送酒就揩多少少鹽齋食就唔駛
加返辣椒碎食就再突出啲
諗住睇吓有咩書好，見到《我想吃掉你的胰臟》
（君の膵臓をたべたい by 住野よる）
就變咗搵吓邊度有好食嘅內臟（哈）
坐低未嗌嘢就有前菜冷番茄
好新鮮嘅清甜番茄浸响柚子醋度
絕對係美好嘅開始！
食串燒飲啤酒就最爽～～～
呢度除咗有Suntory ザ・プレミアム・モルツ
仲有甜甜唔會苦嘅Suntory ザ・プレミアム・モルツ〈黒〉黑啤
日本啤最專注佢層綿滑細密嘅泡
所以好多日本啤機都係會有一條出酒一條出泡咁
呢間係食豬串燒，仲有好多係內臟㖭
先嚟串豬喉軟骨串（フエナンコツ）
簡單灑鹽就燒，勁爽脆cop cop cop嘅感覺
仲有啲豬香味好正呢！
豬顎骨肉串（豚のアゴ肉）
啲肉同我塊面一樣咁彈吓彈吓
西班牙產豬肩肉串（スペイン產イベリコ）
イベリコ只係ibérico咋喎，點解唔譯埋個膊頭嘅？
唔係樣樣嘢都食唔返以前嘅味道啊…
BB鴿
紅燒嘅白鴿小寶貝（muah～）
皮脆餡香鴿肉味香又juicy
當然唔少得軟軟滑滑乳鴿頭
即係個腦呀，嫩嫩滑咁太好食喇！
招牌雞粥
粥面雞油香粥軟綿而雞肉比粥更滑
滑得嚟唔會冇雞味
同細個果陣食嘅一樣：啲生蔥都仲係好辣好難食 XD
豉椒炒鵝腸
Mmm… 唔係好覺眼啲豉去咗邊
由賣相到味道都係洋蔥彩椒炒鵝腸
鵝腸量都唔算少，冇臊味唔臭爽爽咁囉
不過同頭先兩樣比就真係比下去
咁間嘢响我未出世嘅70年代就只係靠乳鴿雞粥就撐起半邊天嘅
冇得搭程機去奈良志津香
咪留响香港食慰藉吓心靈同五臟囉…
越淡麗同梅酒
清甜嘅純米酒同甜味飯後酒咁啦
炸日本池魚仔
Aji條條肥嘟嘟咁
新鮮唔會腥甜味香味濃郁
淺炸魚就爽好多唔會好油膩
好味呢～
唐揚墨魚咀
已經灑咗滿滿七味粉
好夠辣完全中和炸漿應該有嘅油度
爽軟爆汁墨魚咀嘛
好難唔一口接一口接一口接一口咁風暴吸入
但係要忍住啊！呢啲只係小食咋…
跟釜飯會有嘅刺身
有俾咗人哋食嘅三文魚
都好新鮮漿漿地口嘅帶子同蝦
わさび係有埋纖維即磨嗰隻而唔係唧唧貨
除咗刺身跟飯仲有六味前菜（好豐富）
有啲for送飯；有啲真係前菜啦
特別想講中間呢杯茶碗蒸
有齊新鮮蝦蟹肉三文魚籽黑松露冬菇雞肉
啲蛋仲係極！級！嫩！滑！！！
視覺同味覺都非常滿足！
意大利菜係樣衰衰求求其咁
但係好好食嘛，樣有時真係唔太緊要
Bresaola
pizza材料有最痛恨嘅火箭菜
白芝士Fior Di Latte，即係半軟新鮮嘅mozzarella
同埋意大利綿羊奶芝士Pecorino
番茄醬base香得嚟帶微酸好開胃
火箭菜當然係苦
不過份量唔多啱啱好中和兩種芝士嗰少少漏
餅底唔會好似麵包咁厚
亦唔係薄身脆餅嗰種
加埋炭香味足又極為煙韌
好好味呀（超讚）
Colatura di Alici
雖然睇落唔係好多嘢
佢混合咗水牛芝士mozzarella、紫洋蔥、anchovy、辣椒、Gaeta橄欖等
清爽中帶微辣，本身洋蔥嘅辣加辣椒
零油膩感卻唔乾身，味道都好讚！
Gragnano Dellapenisola Sorrentina, D.
啤酒配炸雞？NO呀！
啲雞係焗㗎冇咁油嘅…
Goobne UFO Fondue
即係唔炸啫，咁大兜芝士都幾爆脂嘅嘻嘻
上枱嘅係三種未溶嘅芝士
有勁拉絲嘅mozzarella
溝乜都得嘅cheddar
同硬芝士grana padano
要開爐攪攪攪先得㗎
一共有十六件雞搥
可以揀兩款
咁我呢種「士到盡」嘅梗係會配三重芝士烤雞
同食韓雞冇理由唔嗌嘅韓式BBQ醬煙燻烤雞
芝士鐵鑊兜搽滿油
就咁攪無啦啦係絕對唔會黐底啦
溶晒就食啦唔好等
個韓醬微微辣味配芝士就啱啱好
芝士雞係cheddar、cream cheese同滲咗blue cheese粉
即係加埋芝士面就係五重芝士雞哈哈
漏㗎，所以好彩佢係烤雞唔係炸雞
將「奇跡」擺上枱…
KISEKI PANCAKE PLAIN（原味班戟）
稱為「奇跡のパンケーキ」
鬆軟高高嘅pancake
入口香鬆軟甜蛋味重
pat cream有奶味唔會好厚身
完美咁配搭响好似浮雲咁嘅班戟度
好好味真係好好味（打緊post一直流口水）
BACON & EGG PANCAKE（煙肉煎蛋班戟）
原本嗌三文魚牛油果班戟但係嚟錯咗
唔緊要啦佢個樣都係好吸引
同甜pancake唔同，係較薄身嘅班戟
麥味非常香濃，配埋半熟煎蛋同大大片煙肉
個butter cream都係輕輕嘅
煙肉班戟夾唔會勁甜嘅糖漿啱啱好
有咗糖漿個pancake就唔會太乾身
啊！新鮮菜salad同個沙律醋都係簡單而好食
酸菜唔會好酸食落中和返所有油膩感
雖然好鍾意台灣牛肉麵啲香濃湯底
但係咁鬼熱嘅天氣真係唔想蒸住塊面啊…
招牌麻辣牛肉撈麵
托埋塊招牌出嚟
超～ 嫩～ 一嘢就咬得開嘅牛腱
微微川燙過嘅牛肉薄片
兩種濃郁牛肉味中又帶麻辣味
要吸麻辣味當然唔少得蜂巢豆腐
微細窿嘅豆腐，一咬就咇咗微酸麻辣豆味
係嘅，麻辣嘢係唔可以冇鴨血
唔腥又夠韌，麻辣 x 鹵水美妙嘅組合
闊身白麵好掛湯，唔食得辣嘅我叫中辣就啱啱好
韌性足好好好好咬
成碗麵嘅完成度太高喇！正！
叫撈麵會配埋蛋花湯
唔會好鹹又有絲絲滑嘅蛋花
不過習慣港式麵檔撈麵配湯嘅我
都係唔敢將啲湯一飲而盡
滷肉飯
响食麵嘅地方叫飯有時候係會有伏
不過幸運之神今日企响我呢邊
因為懶，所以隨手撳間餐廳嚟試…
唔想諗，就篤支有汽嘅酒嚟飲
Bouvet Brut
滿滿汽泡嘅Chardonnay
香氣足入口乾身卻唔會好嚡
配白肉係好夾嘅…
日本八爪魚腳配秘制醬汁
八爪魚腍身唔韌亦冇雪味
黑色嘅紫菜醬油味道唔太突出
而白色芥末泡非常好味
不過兩者合埋都OK嘅
黃金手工蟹波配菠蘿酸忌廉
大大粒仲要全部都係蟹肉！！！！！
呢個極！級！好！食！！！
係由脆脆嘅外層到爆滿鮮甜蟹肉到又酸又甜嘅sour cream都冇可挑剔！
响主菜嘅羊肉同鴨胸之間周旋
但係個汽酒實在太汽，唔肚餓的說
因此繼續食小食：法式鵝肝多士
硬脆嘅法包多士主角係熱辣辣鵝肝
面層係微焦糖青蘋果片
雖然係啪咗塊膶但一啲都唔漏
喂呀間嘢啲嘢全部都好咁好食嘅衰鬼？！
Shine Perfectly
又去食唔辣嘅韓國嘢~
韓 • 仙人掌果酒
話係「冷霧鮮果特飲」
真係有啲白煙响度（個樽中間嗰層）
微微嘅甜味 x 極淡嘅酒味
當係detox water咁飲囉…
反正裡面都係啲生果呀有片仙人掌咁
韓式烤美洲巨鰻扒
衝住呢樣嘢而嚟
因為今日係加一蚊多一份
（呢碟已經係兩份喇）
大大片好厚肉魚油滿滿好滿足
已經調過味就咁包埋葉食啱啱好
呢盤唔係花槽係包菜葉
kimchi們，大兜嘅係熱嘅好新奇
酥炸芝士魷魚桶
佢個炸漿同魷魚之間有好大嘅距離
有住同韓式瀏海一樣嘅空氣感
不過芝士有拉絲魷魚都算新鮮
其實幾好食嘅…
週末係絕對可以放縱地食嘢！
Acrobrau Weissbeer Hell
食德國嘢唔飲啤酒飲咩呀？
冇咩㗎咪就係入口香囉！
一公升巨巨杯飲完有排去洗手間之嘛…
冇dunkel所以嚟咗呢杯黑啤
一公升also，呃！個味淡咗啲啲
都有淡淡香味… 嘅……
Nuremberg Sausages
豬肉味好香！
酸菜又令人一口接一口
薯仔炸得外脆內粉
完成度好高嘅菜式呢~
Strudels (Open Face)
開口雲吞咁，酥皮 x 脆芝士 w/菠菜餡
配菜嘅三色蘿蔔好好味
咁啱行過又見只係排幾粒人嘅隊咪試吓囉
（其實想試好耐㗎喇喇喇）
個牛角包仲大過我隻手！
油㗎！摸落都成手油
食croissant唔油邊好食㗎？
摸落油還油，食落一啲都唔膩
如果買多個都仲食得到
不過唔好睇我話「食得到」就代表裡面全空氣咁喎
極！足！料！呀裡面
當然一層層咬落就已經見到
只係因為佢鹹鹹哋唔係平時啲甜味咁
好容易「吓？食完嗱？」咁啫
牛角包內鬆軟有彈性
外層片片跌落角位超級脆口
每個部位都好好食
唯一會扣返少少分係佢唔係熱嘅
出爐包會再再再好食啲啊啊啊啊啊！
