All Posts
顏色豐富又夠玩味
好難唔鍾意佢嘅畫喎…
仲要將唔同嘅卡通crossover
喂呀駛唔駛咁有親切感呀？
小Homer極cute囉
好強嘅街頭藝術風格
同時好有佢嘅個人特色
放射階磚造型好sharp
cross得好搞笑睇得好開心呢~
呢隻薑糖好好食！
印尼嘢，原料只有蔗糖、薑同木薯粉三樣
有薑味唔會太辣亦唔會好甜
最緊要係夠韌極好咬仲唔黐牙
口淡淡又唔想食香口膠就會食佢~~~ 堅正！
…細細個嗰陣就食新亞嘅
薑味係濃啲不過甜得滯同勁黐牙
所以而家都投靠Chimes呢邊喇
粟米筒呢樣嘢
間唔時就會想買嚟食
不過個頻率大概係一兩年一次咁上下…
咁見今年出cream cheese味咪買囉
粟米筒依然足粟米味又香又脆
個芝士味一開袋就聞到
食都食得出（調味粉威力強大）
自私食食咗三分二就夠晒皮
but最後慢慢慢慢食又會清咗袋喎…
唔錯嘅不過下次一人隊都係買細袋裝好啲（嘻）
直航機係貴啲嘅
不過永遠都係人嘅時間無價
凌晨12點delay到1點出發
12個幾鐘就到AMS
當地嘅時間朝早7點咁上下
完全可以玩足一整日唔浪費
然而呢鑊唔係淨玩荷蘭
所以就搭火車先去比利時
啲位似東鐵頭等凳
皮面唔係污糟地氈面咁啦
cya 荷蘭風車～（揮手）
中午前已經跨完境到達比利時首都布魯塞爾（Brussel） 喇～
未夠鐘check in都可以先擺低行李响apartment
住正市中心周圍行都好方便
去布魯塞爾大廣場（Grote Markt） 係必須的
世界文化遺產响"屋企"樓下冇理由唔兜吓
哥德式建築嘅市政廳（Stadhuis） 建於1402年
睇嚟今年都唔會去韓國
咁就去試吓韓國票選冧巴溫嘅pizza店啦！
Pizza 群蟹派對（番茄醬底）
呢度嘅pizza係用自家特製嘅綠茶餅底
（亦都响韓國拎咗專利）
以小藻發酵，所以個色都綠綠哋
食落帶韌性不過冇茶味
除咗番茄醬base仲有中層BBQ醬同面層嘅沙律醬
可能因為個配料係蝦肉同蟹絲
成件嘢加埋唔算好漏
蒜香甜辣秘制炸雞
雖然pizza係冧巴溫然而呢度係主打pizza & chicken
見到menu寫秘制咪try try囉
吖！個蒜只帶其香冇其蒜嗆
熱辣辣加上甜中帶超微辣味好好味（讚）
間嘢有由韓國直送嘅手工tap供應
Slow IPA
喂呀呢杯係得獎啤喎係咪都要飲嘅
入口爆濃郁嘅甜味
個甜味好快散開形成回甘嘅苦味
之前去曼谷原本都想試呢間皇室菜
奈何間嘢嘅位置唔順路咁咪算囉
反正，香港都有得食（嘻）
仲要係勁抵食嘅高水準下午茶set
先食鹹點再食甜品
由下層講上去啦
下層嘅炸物鹹點有外脆內彈牙嘅香脆蝦餅
外皮薄脆嘅泰式春卷
同埋連住脆殼蝦尾嘅泰式比利時炸蝦
佢個比利時唔係地方名嘅比利時Belgium
係直譯brasserie croquette個brasserie咁解
（menu串croquette串咗crqqette有啲搞笑）
中層係蒸&鹹冷點
左手邊黃色底係馬可Ma Hor
將熟肉碎調味煮好再放响菠蘿上面
中間用蔞葉（檳榔葉唔係蕉葉）包住造成嘅柚子蟹肉沙律卷
好清新同鮮味，蟹肉一絲絲咁好足料
右邊藍色白色唔同造型但都同味嘅係皇家宮殿蒸餃子
個形靚嘅味道都唔錯
係因為要呢個造型個皮一定會厚啲
如果攤太耐先食個鴿頭會太硬
頂層當然係甜品time
趁熱會好好食嘅暖心榴槤撻
好太陽咪出吓海吹海風囉…
第一站，先去鴨頭咁嘅鴨洲
佢係全香港有人居住中面積最細嘅離島
只得0.04平方公里大概五分之一個維園
全盛時期有過千人居住（哇…）
而家就得返三個人係長居
落船
就一支箭咁飆去睇地質
穿過貝殼灘
鴨頸 - 俾海水沖到爛（斷裂帶）
鴨眼 - 一個大嘅海蝕拱
鴨蛋（細細粒嘅島）
到最篤篤嘅海蝕平台
呢度嘅褐紅色嘅氧化鐵質角礫岩
係來自大概一億年前白堊紀
吹海風係好爽，不過好L曬…
返入漁村前又行吓上頂吓景
喔！登頂！
俯瞰鴨洲漁村
碼頭
左邊山後面係荔枝窩
十九幾年冇去過京都
又預咗短期內都去唔到
咪唯有食吓啲京都嘅慰藉吓心靈同內臟囉…
八寸
八樣前菜
個裝盤係一の傳個「一」字
食嘅次序都係同寫一字一樣由左至右
イクライクラ冷やし茶碗蒸し
小小一杯嘅凍嫩滑燉蛋上面有粒粒三文魚籽
滑滑嘅感覺中加埋魚子濃郁味道嘅衝擊
胡麻豆腐
沖繩用花生磨咗再凝固成花生豆腐
胡麻豆腐就係京都嘅版本
用白芝麻整好凝固，食落啖啖芝蔴味
唔係嫩滑亦唔會韌身
加埋佢個枕崎鰹魚湯汁就啱啱好
茄子のおかき揚げ
脆米包住煮到腍腍嘅矮瓜再去炸
超脆嘅外層同又腍又濕嘅主體既好食又足玩味
山桃蜜煮
糖煮babyberry，甜甜之中有微微嘅酸味
哎吔吔又好開胃㖭…
帆立日本茶揚げ
帆立貝上面有啲茶(渣?)
茶唔會澀仲好提鮮，係帆立貝個鮮！
炒完地鐵話好好人咁俾三日半價喎多謝晒 入去十世都冇去過嘅元朗
行咗大馬路同周邊都冇嘢啱食
熱到hihi咁都係要入返商場
特登嚟唔係食呢度嘢條氣會唔順嘛
反正唔駛等位就食呢間
鮮蝦雲吞麵
lunch set有麵有小食同嘢飲
個麵夠爽冇鹼水味
雲吞有四大粒而蝦都係新鮮彈牙
掛麵湯底唔太鹹
不過都係要加醋去解一解個湯面嘅油膩
炸鯪魚球
Mmm… 我真係好鍾意食鯪魚球㗎
但係呢兜真係真係真係好唔掂
個炸，係炸得幾好
至少熱辣辣同有住薄薄脆口
BUT個魚蛋極度唔得
完！全！唔！彈！牙！
即係呢平時啲魚膠蝦膠喪打就會彈彈彈
而呢個就似打都冇打過齋拆肉攪兩攪就唧做波咁 唉~~~~~~~~~~~
自製薏米水
話說我係個認真工作嘅人
而睇報紙雜誌網站係工作之一
有日搜索式睇雜誌嗰陣
見到本嘢最後一頁有個細細忽寫住
「思高®牌膠紙周圍轆送大禮」喎
又咁啱响知道呢樣嘢之前兩個星期已經影過
睇個資訊欄話差唔多截止
咪試send吓得唔得反正冇損失…
喔！收到得獎mail
拎到呢份文具禮品包
唔係啲咩貴價嘢只係覺得都幾幸運咁啫…
係我衰！我係人渣！
之前嫌ECO Can plus漏水兼唔係黑色
好啦買咗個:chocoolate保溫杯都唔夠兩年
就覺得自己造成嘅風霜痕跡刮到佢一條條個面唔再黑
然後當然就會一堆藉口嫌棄佢
咁又俾我見到呢個ZUCCa嘛
ZUCCa話晒都係響啲嘅牌子吖
少少虛榮都唔過份啊！
黑色啦矽膠啦仲摺得埋喎
打開係放到355ml
個蓋好好咁cup實就唔會漏水！
（新入手總是美好的）
ELLE呢啲廣告雜誌真係會响呢啲時候先會買
（揭過fast read一次就掉就咗，墊煲底都怕本嘢熱到黐落枱）
然而杯呢家嘢一屋都有幾千個
捐極都仲會有嘛…
好唔生性囉我，所以我一定會好好哋用耐啲㗎喇… 應該……
派手信時間…
由荷蘭比利時返嚟
俾waffle嘅話會被以為係荷蘭餅
即係中間有焦糖嗰隻
不過試過佢新鮮嘅話就超超超好食
買返嚟嘅話响荷蘭買同香港買嘅分別唔大
所以就買咗做waffle都好出名嘅比利時嗰種
只係平時講開比利時waffle就會係厚身嘅
超市呢隻係餅乾款
用超市貨去hea同事？非也！
睇中佢係拎零食獎ITQI Superior Taste Award
仲係最勁嘅三粒星先入手
（C/P值高係買嘢嘅宗旨）
餅都算大塊，有大半隻手掌嘅size
甜甜哋又唔會過甜
個牛油味聞到亦食得到
塊餅仔稍厚微硬兼夠脆口
就係食得開心又唔失禮嘅下午茶小食啦！
