All Posts
意大利菜係樣衰衰求求其咁
但係好好食嘛，樣有時真係唔太緊要
Bresaola
pizza材料有最痛恨嘅火箭菜
白芝士Fior Di Latte，即係半軟新鮮嘅mozzarella
同埋意大利綿羊奶芝士Pecorino
番茄醬base香得嚟帶微酸好開胃
火箭菜當然係苦
不過份量唔多啱啱好中和兩種芝士嗰少少漏
餅底唔會好似麵包咁厚
亦唔係薄身脆餅嗰種
加埋炭香味足又極為煙韌
好好味呀（超讚）
Colatura di Alici
雖然睇落唔係好多嘢
佢混合咗水牛芝士mozzarella、紫洋蔥、anchovy、辣椒、Gaeta橄欖等
清爽中帶微辣，本身洋蔥嘅辣加辣椒
零油膩感卻唔乾身，味道都好讚！
Gragnano Dellapenisola Sorrentina, D.
喫茶去~
抹茶喫茶去パフェ 抹茶芭菲 Matcha parfait
一杯乜都有嘅甜品
上面插住條唧滿抹茶cream响裡面嘅抹茶繪巻
（哎吔吔唔係抹茶曲奇但係都唔緊要啦）
固定响抹茶味濃郁嘅滑滑軟雪糕度
雪糕上仲灑咗抹茶粉同玄米粒
落啲係一原味白一抹茶綠嘅超煙韌白玉
白玉側跟係同抹茶最夾嘅甜甜煮到起晒沙嘅粒粒红豆蓉
墊住佢哋嘅有玄米早餐脆片
對落嘅係一圈又一圈輕身抹茶cream
配埋中間啲抹茶味濃厚嘅蛋糕就啱曬
最底層係味道濃烈嘅抹茶jelly
成杯嘢就係抹茶抹茶好抹茶咁
吖～ 又出奇地唔會好甜，勁正呢！
抹茶かき氷 宇治金時抹茶刨冰 Matcha shaved ice
熱嘛… 食刨冰好正常
啤酒配炸雞？NO呀！
啲雞係焗㗎冇咁油嘅…
Goobne UFO Fondue
即係唔炸啫，咁大兜芝士都幾爆脂嘅嘻嘻
上枱嘅係三種未溶嘅芝士
有勁拉絲嘅mozzarella
溝乜都得嘅cheddar
同硬芝士grana padano
要開爐攪攪攪先得㗎
一共有十六件雞搥
可以揀兩款
咁我呢種「士到盡」嘅梗係會配三重芝士烤雞
同食韓雞冇理由唔嗌嘅韓式BBQ醬煙燻烤雞
芝士鐵鑊兜搽滿油
就咁攪無啦啦係絕對唔會黐底啦
溶晒就食啦唔好等
個韓醬微微辣味配芝士就啱啱好
芝士雞係cheddar、cream cheese同滲咗blue cheese粉
即係加埋芝士面就係五重芝士雞哈哈
漏㗎，所以好彩佢係烤雞唔係炸雞
今日唔搭遠程火車，齋留Brussel都玩足一日
飽肚先可以行動 @Galét
等開門都要去食嘅列日窩夫
食早餐唔飲啤酒飲咖啡
原本十五十六嗌唔嗌埋甜嘅嚟食
點知叫咖啡就已經會送埋
好L好味啊啊啊～～～（流口水）
食飽就買張Brussel交通卡MoBIB card
然後走去搭路面電車
搭到總站，天朗氣清行吓路好快到…
原子球塔 Atomium
為1958年呢度舉行嘅世界博覽會而興建
高102米，連接嗰9粒波波嘅鋼管構成相當於放大1650億倍嘅α鐵嘅正方體crystal structure
就算今時今日睇佢都係充滿住現代感
好難相信係咁多年前已經有嘅前衛設計
不過嘛… 個塔呢邊無遮無擋今日仲天氣咁鬼好天朗氣清萬里無雲
影相係靚嘅but又曬又熱真係要快啲避避呀太陽伯伯
搭電車去飲吓啤食個lunch啦～
MASE Pils - 見佢個樣咁清澈就知味淡淡純粹解渴用（笑）
我不嬲都準時收工嘅
所以咪可以有多啲時間做自己鍾意做嘅事
包括… 睇日劇！
都係由漫畫改編嘅電視劇
講一個之前工作過勞而暈倒之後就講明唔加班嘅女主角東山結衣（吉高由里子飾演）
佢身邊啲同事同伴侶屋企人嘅事
劇情嘛… 就係十集裡面一集一位配角嘅單元
呢集講完佢下一集就變返大配角咁
OK嘅好似比就咁睇個冇乜表情嘅吉高由里子好少少
之但係有向井理向井理向井理啊！！！（好重要嘅講三次mode）
呢條主線預咗會有好結局而真係有好結局太好喇實在拍手掌
咁其實套嘢又唔悶
幾好睇吖都係會推薦吓（向井理向井理向井理！）
係唔係香港人都可以飲嘅香港啤～
（飲個啤酒啫唔需要分化嘅）
大浪灣IPA，柴灣廠出啦唔係大浪灣水釀造請放心
勁香夏日果香味，入口第一嘢都好香甜
隨之而嚟就係苦味極濃嘅麥芽同豐厚麥汁
個苦味after taste仲好持久
感覺似一位少女一夜之間就經歷咗拍拖結婚再老公出軌心痛離婚同時間死埋老竇咁
甘苦與共層次非常豐富
難怪拎到國際獎項
咪理啦，咁L熱梗係要隊返支夠凍又夠氣嘅條氣先至順返啲
如果有人大叫啲咩曲奇餅係香港終於有手信
要我認同就真係sor9y喎
同本地啤比起上嚟嗰啲咁嘅嘢堅係爭咗十萬九千皮囉…
將「奇跡」擺上枱…
KISEKI PANCAKE PLAIN（原味班戟）
稱為「奇跡のパンケーキ」
鬆軟高高嘅pancake
入口香鬆軟甜蛋味重
pat cream有奶味唔會好厚身
完美咁配搭响好似浮雲咁嘅班戟度
好好味真係好好味（打緊post一直流口水）
BACON & EGG PANCAKE（煙肉煎蛋班戟）
原本嗌三文魚牛油果班戟但係嚟錯咗
唔緊要啦佢個樣都係好吸引
同甜pancake唔同，係較薄身嘅班戟
麥味非常香濃，配埋半熟煎蛋同大大片煙肉
個butter cream都係輕輕嘅
煙肉班戟夾唔會勁甜嘅糖漿啱啱好
有咗糖漿個pancake就唔會太乾身
啊！新鮮菜salad同個沙律醋都係簡單而好食
酸菜唔會好酸食落中和返所有油膩感
star乜嘅咖啡基本上我係不敢恭維嘅
但係佢嘅周邊唔錯，素人嘅cup art更正！
恨到佢嚟香港擺展覽喇終於（撒花）
（容許我糟吐一吓人哋啲場就會傾到啲正嘢嚟做… 唉…）
有幾隻18:1大外賣杯for影相
個展仲要擺响間star乜出面，哈哈～
30款之前埃豬見過
再加20個特登設計嘅「香港」主題
大杯打卡位有大排檔
（應該叫「大牌檔」呢…）
打牌（三缺一爭我）
Ngong Ping三碌拎 x 大佛
搶包山
& not杯裝嘅點心
而相對大型裝置會比較鍾意睇真跡
其實唔係只係star乜，係杯都係佢嘅「畫紙」啦～
（個馬東錫好很型！）
不過都係star乜個樣最突出啦
尤其因為佢用嘅star乜綠隻色嚟畫嘛
哎吔吔，12集咁快就做完…
由漫畫改編嘅同志日常小品故事
勁靚仔嘅西島秀俊飾演筧史朗
同表情連小動作都超神似
唔講係直男真係以為本身came到入血
飾演美容師矢吹賢二嘅内野聖陽一齊住埋嘅點滴
套嘢叫『擒日食乜餸』梗係集集都有飯食
有嘢食有仔(佬啦)睇劇情有夠寫實有時搞笑仲有時幾sweet
冇睇過套漫畫但聽講都拍得好忠於原著
（爸爸嘅角色後尾兩集因病換咗人）
死啦～ 已經有啲失落㖭（扁嘴）
一日向南；一日向西；一日向東
YES！今日向北呀～
當然係搭火車啦～
but今日唔係假期冇6折買飛嗰陣啲肉即刻赤赤痛啊陰功
已經講緊係一粒鐘都冇嘅短程咋（淚）
Antwerpen-Centraal
話說佢係其中一個世界最靚嘅車站
本身係木車站，有住「鐵路大教堂」嘅稱號
咁呢個城市係鑽石交易市場
鬼咁有錢… 啲建築梗係可以有咁靚得咁靚啦
開始遊Antwerpen喇
陰天呀啲頂影出嚟唔及得肉眼睇咁金光閃閃
所以都係親身去啦
Stadsfeestzaal
雖然周圍都好古典石樣 x 金光閃閃咁
然而行過都係會俾呢座嘢嘅金嚇一嚇停低睇吓
裡面都係咁金…
原本係市政廳，而家係商場啦
Antwerpen嘅名係嚟自Hand Werpen「丟手」
所以呢隻手係呢度嘅象徵啊！
今日起身有啲晏變得差唔多中午都未有嘢到肚
雖然好鍾意台灣牛肉麵啲香濃湯底
但係咁鬼熱嘅天氣真係唔想蒸住塊面啊…
招牌麻辣牛肉撈麵
托埋塊招牌出嚟
超～ 嫩～ 一嘢就咬得開嘅牛腱
微微川燙過嘅牛肉薄片
兩種濃郁牛肉味中又帶麻辣味
要吸麻辣味當然唔少得蜂巢豆腐
微細窿嘅豆腐，一咬就咇咗微酸麻辣豆味
係嘅，麻辣嘢係唔可以冇鴨血
唔腥又夠韌，麻辣 x 鹵水美妙嘅組合
闊身白麵好掛湯，唔食得辣嘅我叫中辣就啱啱好
韌性足好好好好咬
成碗麵嘅完成度太高喇！正！
叫撈麵會配埋蛋花湯
唔會好鹹又有絲絲滑嘅蛋花
不過習慣港式麵檔撈麵配湯嘅我
都係唔敢將啲湯一飲而盡
滷肉飯
响食麵嘅地方叫飯有時候係會有伏
不過幸運之神今日企响我呢邊
因為懶，所以隨手撳間餐廳嚟試…
唔想諗，就篤支有汽嘅酒嚟飲
Bouvet Brut
滿滿汽泡嘅Chardonnay
香氣足入口乾身卻唔會好嚡
配白肉係好夾嘅…
日本八爪魚腳配秘制醬汁
八爪魚腍身唔韌亦冇雪味
黑色嘅紫菜醬油味道唔太突出
而白色芥末泡非常好味
不過兩者合埋都OK嘅
黃金手工蟹波配菠蘿酸忌廉
大大粒仲要全部都係蟹肉！！！！！
呢個極！級！好！食！！！
係由脆脆嘅外層到爆滿鮮甜蟹肉到又酸又甜嘅sour cream都冇可挑剔！
响主菜嘅羊肉同鴨胸之間周旋
但係個汽酒實在太汽，唔肚餓的說
因此繼續食小食：法式鵝肝多士
硬脆嘅法包多士主角係熱辣辣鵝肝
面層係微焦糖青蘋果片
雖然係啪咗塊膶但一啲都唔漏
喂呀間嘢啲嘢全部都好咁好食嘅衰鬼？！
Shine Perfectly
