[麵] 友拉麵
嗰幾個連住嘅商場仔有好多細舖
（留白、轉角 ‧ 見、森美餐廳、
餃子屋、滷友記嗰啲都係）
全部都唔係連鎖店感覺上有人情味啲
日式屋台裝潢加好多隻貓嘅畫
諗起同樣係滿舖貓掛畫嘅麵.睦月
蔥山拉麵
啡白色嘅魚介湯底
配上綠色蔥山感覺好earthy
真係多蔥如山㗎哈哈
魚介湯底味道香而濃郁
無豬骨湯底咁油膩
火炙豬肉肥瘦均勻又燒得香
味玉係流心貨仔
筍入味嘅紫菜大大塊食得滿足
最緊要係啲蔥！
本身唔鍾意食蔥嘅我都覺得佢唔臭唔辣
所以成碗嘢都好香，幾好幾好～
櫻花蝦拉麵
基本配料一樣只係將大量嘅蔥換成大量櫻花蝦
湯底變得超！香！甜！！！（握拳）
賣相呢就一生懸麵靚少少
不過講蝦香呢碗無得輸，就咁。
期間限定 - 完熟番茄拉麵
咪就係濃郁香甜番茄湯咁囉
即係嗰啲去食茄牛麵啲湯底咁濃
味道唔錯，啊！漏咗講：呢度啲麵都幾彈
所以整體嚟講係好食嘅～～～
日式煎餃子
一般咁啦，只係煎熟咗唔係香口囉
炸牛肉薯餅
呢個好食好多！
熱辣辣又有薯味仲有少少牛肉晌裡面，呵呵～
唔係一定要過江龍要有個日本師傅响度先好食嘅
個廚師有心整，啲食材夠新鮮就有美味呢～