[高馡] 留白 Blank Cafe

要同十幾年冇見嘅人重遇
幾揀一之下揀咗轉角‧見
點知去到嘅時候兩條友都無睇門牌入咗嚟呢間 XD
（仲要係好耐之後先發現）

牛油果藜麥大蝦沙律 | Avocado Quinoa and Prawn Salad
成兜嘢新鮮新鮮好新鮮！
牛油果夠晒熟又香又creamy
啲蝦大大隻爽口彈彈牙
粒粒藜麥好似個陳醋醬咁令配搭完美
well，完全ignore咗我唔食嘅火箭菜

慢煮牛 Bagels | Beef Bagels
罌粟籽bagels裡面有新鮮沙律菠菜、
Cream Cheese、Cheddar Cheese同慢煮牛肉

見有芝士梗係要拉吓絲（節目效果，哈！）
個cream cheese x cheddar嘛
一黃一白加上溶化咗睇落好似流心蛋咁
食落當然係濃郁芝士味
配埋半生軟熟慢煮牛肉更香
當然個bagels本身帶韌性有麥香又爆脆兼出味嘅罌粟籽
嗅覺同味覺都係大大滿足
好在有新鮮爽脆嘅菠菜平衡返
（唔係用又苦又爆草味嘅火箭菜，真好）
成個包變得無咁漏，but會飽肚啦～

班尼迪 | Egg Benedict
見到menu有egg benedict通常都會心心眼
poached egg個蛋白唔會酸個蛋黃又夠流
雖則唔係最傳統味道嘅荷蘭醬
不過夾返呢隻蛋又幾好味
墊層邊脆內仲有油花同肉香嘅煙肉
配埋底嘅烘得脆脆嘅sourdough好match
個沙律啲菜都係新鮮貨色
有埋煙三文魚就令齋菜salad無咁寡，正！

黑松露雜菌意粉 | Creamy Truffle Mushroom Spaghetti
係預期中嘅黑松露香
雜菇好咬唔會乾身
意粉亦唔會overcook至腍身
整體係菇味鮮濃卻唔太鹹，唔錯唔錯呢～

Caffè Latte
冬天嗰陣飲熱啡
standard啡唔酸唔苦咁啦

Tonic Espresso | Dirty
夏天就飲凍嘅
呢杯tonic espresso就偏酸
响呢個時間飲都幾爽㗎！
而dirty嘛個樣唔係好dirty
啲啡未開始浸不過已經急不及待咁飲（夏天口渴）
好milky，個啡base唔酸
但係唔解渴哈哈

話說相隔半年去做兩次
少有地會翻兜餐廳都已經有啲唔同
出奇在竟然再响menu度揀
個沙律同意粉口味都係翻兜返
好似呢個人咁，隔咗幾多年都好都係會揀返佢
有啲嘢自己一直鍾意
無論係點都仲會好鍾意
就算menu有其他選擇都只會揀返嗰個味道
唔再試新嘅就唔再試
因為已經揀咗自己最鍾意嘅，我唔後悔
我真係唔後悔…