[歐] 森美餐廳 Cafe Sammi

同佢搵餐廳揀嘢食嘅最大分別
會係我鍾意試完一間下次會試第二間
佢呢鍾意去一間餐廳就會翻兜翻兜再翻兜
好啦咁呢間又真係好食嘅
所以由日食到夜都未食得厭…

火腿滑蛋牛角包
嗱！好鍾意食牛角包嘅我見到一大清早就有佢買仲送埋上嚟
本身件事已經夠美好
加上外賣嚟都仲係熱嘅
個包夠酥蛋皮夠軟滑沙律菜都新鮮
點都係個good morning啦！

香煎牛肉眼扒
配迷你牛角包、炒蛋、炸薯餅、茄汁焗豆
外賣都好味堂食都唔會伏
牛扒肉質夠腍汁standard嘅
茄汁豆咪茄汁豆囉(mini) all day必備㗎啦
（加上本身都鍾意食）
現場食嘅炒蛋再滑身啲
炸薯餅係其中一樣嘅早餐至愛
夠脆夠熱有薯味就已經好滿足喇
哈哈哈，牛角包啊yeah雖然係迷你版都好開心呀！

美國豬梅扒
配迷你牛角包、炒蛋、炸薯餅、茄汁焗豆
豬同牛都一樣好食

就算揀牛奶 (full cream milk) 都唔使另外加錢
果然cafe同茶記係有明顯嘅分別

碎蛋芝士牛角包
為免阻打工仔s食lunch所以會响tea time先幫襯
tea set嘅牛角包餡料比早餐嘅豐富
碎蛋沙律個份量少咗啲
但係勝在啲芝士同番茄生菜都大大塊都夠晒飽

煙三文魚牛角包
有大片新鮮煙三文魚、芝士、番茄同生菜做餡
用熱辣辣外酥脆內鬆軟嘅牛角包夾住
簡單而美味，好好味呢～

啊！呢度啲凍咖啡都唔錯
不過個menu有西柚汁又無理由唔飲，哈！

終於嚟到夜晚打大佬嘅時間
à la carte咁叫都會有湯跟
是日紅湯，無咩特別驚艷亦唔會覺得唔好味

南瓜湯就濃郁啲
至少兩款湯都係熱，味道都唔會太淡太鹹咁

鳳尾蝦香芒牛油果他他
相比好似草飼牛咁隊個"森美沙律”
當然會揀個睇menu就知道會好食嘅生果 & 蝦呢個組合㗎啦
爽口蝦 x 滑身微酸芒果 x 軟滑牛油果
配埋新鮮沙律菜加意大利陳醋醬
咪就係好食囉，完。

意式番茄燴肉丸
個茄base唔會好甜有返啲正常番茄有嘅味道，good！
肉丸唔係實的的嗰種，好索汁自己本身又香肉汁
加乘起嚟咪又係好正囉！

香辣白酒煮大蜆
上菜嘅時候比佢嚇咗一嚇
因為suppose白酒煮蜆會似
介乎白酒煮青口至清酒煮蜆之間
而呢兜個樣就似喇沙咖喱啲friend咁
不過食落就知真係白酒啦
仲有濃郁牛油味同新鮮蜆嘅鮮甜味
又一道美味佳餚！

風腿芝士pizza
ham & cheese嘅組合無得輸
佢呢隻pizza個餅底係超薄脆餅嗰種
完全係happy food～～～

番茄蟹肉意大利粉
有番茄有蟹肉有蟹籽滿滿料嘅pasta
意粉唔會煮得腍身，又夠香又好味

美國安格斯西冷牛扒（12安士）
早餐細牛扒都okay夜晚唔會點跌watt啩
係啲之餘比早餐嗰塊juicy嘅
有噍頭有肉味連配菜都係心機嘢（心）

飽㗎！但係都食吓呢度啲蛋糕嘅
handmade嘢唔錯嘅
以bakery嚟講，都係牛角包好食啲啫 XDDD

啊！兩間都係叫森美餐廳
然而呢間Cafe Sammi同Sammy’s Kitchen係唔同餐廳嚟㗎～