[麵] 老媽拌麵

又係佢畀我揀食咩lunch嘅日子
記得好耐之前經過見到啲麵個樣有啲想試
但係嗰陣仲圍緊板未開張
好喇到突然又諗起不如食麵都好就坐低等佢過嚟食…

川味紅燒三寶牛肉麵
（牛腱、牛筋、牛肚）
一如以往，有牛肉麵佢係會揀牛肉麵嘅（笑）
其實呢，台灣嘅牛肉麵最「正宗」嘅風味係來自四川
而呢碗係有大大隻嘅辣椒但係唔點辣嘅
啲牛腱呀牛肚呀都炆得腍身
牛筋漿口而且全部都煮得入味
湯底顏色深不過未算好濃滷水豉油味
整體都算叫做okay嘅未去到一試難忘咁解

麻辣老鍋麵
食呢種過江龍嘅餐廳當然想食返當地嘅味道
碗麵有肥牛墨汁豬肉丸響鈴之外
仲有台灣直送鴨血です
恨食麻辣鴨血嘅我梗係唔會錯過
揀咗粗麵，即係關廟刀削麵
（另可揀幼圓身嘅傳統關廟麵同幼扁身嘅關廟拉麵）
啲麵係手工天然日曬嘅
夠Q彈唔易爛亦唔會令啲麵粉剝落滲去湯底
湯底係牛肉麵嗰隻湯再加啲麻辣，都ok辣㗎
老鍋呢就好似火鍋咁咩餸都有啲睇落好豐富
邊爐必備嘅肥牛咪都係肥牛咁
墨汁豬肉丸爽口彈牙
響鈴又係邊爐啲friend
索咗麻辣湯幾好味
嗱嗱嗱！我最最最期代嘅鴨血呢
好食嘅可惜得兩舊唔夠喉囉（哭哭）
仲搭條新鮮小棠菜真係成兜邊爐冇火版咁
係幾好食嘅碗麵，仲要係唔細碗食得飽飽嘅

手工大水餃：韭菜豬肉水餃
都係台灣直送貨仔
水餃係大隻餡料滿滿嗰種
standard嘅味道啦
皮厚薄適中唔會過腍
韭菜夠香肉味都係鮮嘅

涼茶系列：冬瓜檸檬
甜度係固定嘅好在個冬瓜茶本身唔會太甜
加上酸咪咪新鮮檸檬都幾爽㗎～

記得有一輪好興食台灣拌麵
當然啦，啲潮流嘢硬係同我冇咩關係咁
不過其實都係關廟麵之嘛
又使乜講到又新穎又特別咁呢？
okay啦所以最後睇menu都係揀返湯麵唔要拌麵（哈）