[麵] 阿木台灣麵

雖然麻麻地麵食
但就好鍾意台灣牛肉麵
咁呢間無理由唔去試㗎嘛
唯一可以卻步嘅理由只係要排隊
所以一係就咁啱要前後腳等得
又或者較啱時間去就冇問題

紅燒牛肉麵（角切）
鍾意食嘢有得咬咬吓因此揀角切
軟身未到腍身嘅狀態
牛肉味同滷汁味一齊爆出
湯底唔係我至愛嘅中藥材味
不過都唔係求其豉油味hea咗就算嘅貨色
麵條夠彈牙唔錯唔錯！

麻辣牛肉麵（片切）
相對基本味嘅湯底麻辣味就食得興奮啲
較為提香微微麻辣同牛肉好鬼夾
牛肉份量多唔孤寒，牛精都覺得滿足

肉鬆蛋餅

軟滑軟滑嘅蛋餅皮（心）
加上滿滿肉鬆
配埋醬油膏味道啱啱好唔會太鹹
好好味呀～～～

醬油番薯葉
晌街食菜少見嘅番薯葉
見到佢嘅蹤影喎嗌返碟先
除咗菜同醬油仲鋪滿炸乾蔥好有誠意
菜新鮮爽脆連埋調味簡單又美味

冬瓜茶、四季春青茶、檸檬四季春青茶
微糖嘅冬瓜茶消暑解渴
四季春就有得走糖
飲出茶嘅原味，舒爽解膩一流！

番茄牛肉麵（片切）、鹽酥雞（小份）
趁佢陪產檢當然會拉佢嚟試吓！！！
今次終於食另一至愛湯底：番茄湯
冇錯，以湯嚟講呢度嘅複方比單方嘅好味啲
而番茄牛肉麵呢家嘢冇可能唔絕配所以無伏位
切片牛就多啲平面食到筋位
同角切唔同食法兩樣都值得一試（再試）

嘿嘿嘿，煎炸嘢為王道點會無鹽酥雞
脹卜卜嘅炸雞層鹽酥炸漿係有啲厚咗少少
雞都幾juicy而且醃得好Q夠味（惹味鹹鹹鹹）
然而牛肉麵 x 鹽酥雞呢個濃味組合
真係晌台灣都無咁食過 XDDD

阿木台灣蜜餞
哈哈，買「手信」～
紅心芭樂乾低糖食得出番石榴本身個味，好噍頭
青芒果爽囉咪就係，無辣版嘅泰國芒果零食咁
蜜洛神花以台灣特製醃製法，食落酸酸甜甜
金鑽鳯梨乾無添加糖，就咁嘅香甜菠蘿乾已經好好味
愛文芒果乾亦都無添加糖，芒果大大塊而且味係濃甜好正！