和順記 鹹蛋黃神級雞髀皇
抱住清醒阿B食tea
今次挑戰嘅係食大大隻炸雞髀！！！
和順記 鹹蛋黃神級雞髀皇
嗱！我呢就由細細個已經好鍾意下午茶食炸髀㗎喇！
雖然未到咩炸髀關注組嘅程度
但係都有自己界線嘅味道皮脆肉嫩度嘅standard
呢隻髀同傳聞中一樣係誇張嘅大
隻碟好大所以唔係好睇得出個比例
佢大個成隻手掌大概同塊面差唔多咁
不過因為同之前响光榮食過大大隻
所以鎮得住冇畀佢嚇到失禮失禮
要食邪惡嘢就要食到極致
炸再加面層係鹹蛋黃問你死未？
生炸雞髀就係皮超脆
加咗金沙鹹蛋黃coating竟然唔會好鹹
仲有沙沙嘅感覺無只係炸雞皮咁乾身
雞肉juicy流雞油就梗㗎喇
唔係得個大字睇得唔食得嘅
然而齋扯皮嚟食，食食吓啲雞肉會悶㗎嘛
好在佢係有得配汁
我就揀咗可以提食慾嘅黑椒汁
個黑椒味炒得好香因此勁出，非常正！
就算阿B响個一路食一路搞搞震
仲逃出孭帶走去搣牆上啲膠紙又拎counter攝住啲廢紙
都可以無咩太大影響我食晒隻髀
同以前最大分別只係而家無得用手食要用刀叉
可惜一啲都無優雅到，哈哈哈～
個tea set我無再加薯條嗰啲
連埋罐有氣紅色嘢已經夠飽
too much嘅話食唔落晚飯就NG喇！