[越] 越翠苑 Việt Thuý Uyến
呢間越南嘢真係好好食
搞到同佢食完又食食完又去食試吓唔同菜色（嘻）
蟹膏檬粉
雖然試過幾樣呢度嘅嘢都覺得好出色
但係要講一入口就已經覺得驚嘆嘅就係呢碗！
上枱嘅時候熱辣辣
就咁飲頭啖湯好似鹹咗啲咁
不過就係呢個味响口度先再滲出蟹同番茄嘅味道
扎肉係好紮實嗰隻豬紅都唔會一夾就散
原個新鮮番茄爆晒汁咁絕不欺場
蟹膏煎蛋勁香蟹味之外就咁隻蛋味都好濃郁
仲有勁索湯頭嘅豆卜
咩日月精華都畀佢吸晒
檬粉好爽滑，成碗嘢完成度超～ 高～ （正正正！）
沙甸魚法包
晌香港食越南粉麵有好多
而有埋法包嘅就少好多
呢度有喎當然會食返個啦係咪
硬脆烘得乾身嘅超熱法包配會漏油嘅沙甸魚
啲油滲晒入包到個味香到爆
又有越式pickle中和返啲油膩感
好好食呀佢！！！
香茅牛肉撈檬
天氣熱呢點都會食撈檬㗎啦
呢碟見餸多過見粉超足料
燒牛肉有住滿滿香茅 x 焦香味
蒜味同香茅味都好出卻唔會霸道到食唔到牛味
洋蔥爽口唔會太辣
唔需要倒越式魚露都已經好夠味
蝦肉卷檬
嘻嘻炸蝦炸蝦炸蝦卷！
個炸蝦卷爆！熱！外脆內彈牙兼勁香鮮蝦味
配埋凍檬一冷一熱夠晒過癮
佢隻魚露個味校得幾好唔會好甜
撈檬比湯檬個粉更爽口
掛埋啲魚露除咗好味都係好味
吹波豬扒飯、芒果沙冰
當啲嘢要炸嗰陣就會有啲bubble滾嚟滾去睇上嚟就似「吹波波」
so吹波豬扒就即係炸豬扒咁解
醃得夠味炸得夠香
個飯本身都有味，成個配搭好正！
啊！呢度啲沙冰好好味…
香蕉沙冰
除咗濃甜嘅芒果沙冰
呢杯質地厚厚嘅香蕉味都唔錯
牛油果沙冰
然而點講，都及唔上牛油果沙冰（！！！）
夠晒芳香濃郁又唔會太甜
每次去都會揀呢杯（除非賣晒），呵呵～