All Posts
星期六嘅宮崎，响應該頗繁榮嘅橘通人都唔多隻
原來呢度D人比起行街買嘢
會鍾意一家大細一起走去浸溫泉多D
宮崎嘅宮崎市
一係就去貴D嘅大淀川D酒店浸
平民如我，平平地但係都非常爽嘅
當然要嚟極・楽・湯！
如其名真係爆極樂
不過嘛，居民式浸係要自己帶毛巾
無咪買囉都OK嘅，反正唔貴…
但係
.
.
.
.
.
.
我嚟之前已經google過
知道係要帶定毛巾
所以我執行李嗰陣已經包好條毛巾入喼
可惜世事就係咁
當你張條毛巾安安穩穩咁帶去宮崎嘅酒店
就真係會放咗向酒店囉囉囉
莫講話帶去溫泉；連酒店房門都無出過囉（唉～）
咁樣買毛巾真係好唔抵㗎嘛 TT
食飽飯仔就沿住條橘通り行到去大淀川
好寫意係咪？至少我咁覺得…
條河好～ 闊～，感覺上闊過條維多利亞溪港
除咗行吓消化吓
特登嚟，係有「任務」在身！
其實唔係好夜㗎咋
不過係日落早D啫～
-———————————————-
延伸閱讀：Happy Days！鹿児島宮崎！ (10D9N)
早餐食得好飽，brunch個雪糕又頂得吓肚
所以原來skip咗個lunch都唔覺餓
不過搬完行李穿州過省之後
食個tea補充吓體力都要嘅
にくまきおにぎり
尤其呢個宮崎名物肉卷
D肉好似好鬼吸引咁
燒汁味同牛肉味又香喎！
肚唔打鼓；口都流口水啦
チーズにくまきおにぎり
芝士味係肉卷上加碎芝士再用火槍燒
（咬～）
叫得おにぎり裡面梗係有飯啦
日本米就係粒粒飽滿煙煙韌
原味：牛肉同個汁滲入飯
油、肉味加埋燒汁好夾
芝士：芝士係微微搶咗牛肉同燒汁味
不過整體反而更香，鹹味輕微減低
兩個個味道都好食
其實係好普通嘅燒汁牛肉飯味道
但用手拎起熱辣辣咁都OK特色同過癮嘅（笑）
-———————————————-
延伸閱讀：Happy Days！鹿児島宮崎！ (10D9N)
搭巴士由霧島神宮到霧島神宮駅
然後買飛等JR
去呢個旅程嘅下一站
きりしま足美の湯
買完飛唔駛急住去月台等車嘅
車站隔離有足湯浸吓
都係溫泉水嚟㗎！（冒煙冒煙）
正！
浸吓腳仔先～～～
好，浸完就入站喇
呢個站好有特色咁有鳥居、燈籠同條布
上到月台lu，等車走喇
天氣好好風景又迷人連吸啖空氣都覺得好爽
其實仲想去埋霧島温泉市場行吓街啦
响丸尾滝睇吓瀑布啦
甚至係高千穂河原睇火山口通山跑 … … 㗎！
奈何真係唔夠時間
要繼續去下個地方啊
因為搭早D出發（加上平D）所以要响都城駅轉車（嘻）
好，到宮崎駅喇～（hello宮崎！）
雖然要拖住喼由宮崎駅到橘通り
（住呀食呀浸呀都係集中响呢邊嘛）
去霧島唔係唔行吓霧島神宮呀嘛？
相傳創建於6世紀嘅霧島神社
之後霧島火山爆過幾次後
消失咗又重建幾次咁啦
唔講喇，慳返啖氣行樓梯上去啦
話咁快就到二の鳥居
吖～ 到咗展望所
天氣好好！連桜島 (中下偏左濛濛嗰座山)都睇到
（其實影呢張相係唔知嘅，只係人影我又襯吓熱鬧咋。）
客殿同御座所側跟有紅葉呢
然後就到三の鳥居
好喇好喇，終於到霧島神宮嘅本殿喇
未行到個本殿，就俾右手邊呢棵御神木吸引
呢棵杉有八百歲大㗎喇
宜家三十八米高
腰圍七十二米（好粗！）
好似話係南九州D杉嘅祖先
拜唔拜神都好
去要手水舍洗乾淨手清吓口
好多人祈福呢
希望大家都幸幸福福啦～
恋みくじ：要求戀祈放低二百就可以！
掛～～～
我・愛・溫・泉
日浸夜浸真爽皮，啦啦啦～
泉水係霧島温泉
（附近有日当山温泉、妙見温泉、国分温泉…）
而最大特色係呢間嘢會挖附近火山泥
D泥充滿硫磺味
可以敷頭敷面敷晒全身
擒晚敷足全身
因為本身室溫較低，好鬼凍
今朝醒D喇，一邊浸住溫泉一邊敷面
又舒服又可以靚～～～
（係呀！敷完隻泥皮膚乾乾淨淨白白滑滑！）
浸完喇，梗係要食早餐啦
呢度係自助式
不過唔係求求其其嗰種
話說我每樣都想食
而且基本上都唔錯食得人嘅
個豆渣salad好好食，好想試吓自己整
溫泉蛋溫泉蛋溫泉蛋！！！
但係最最最正係呢度自家製甘酒（！）
超～ 好～ 味～！
甜甜蔬菜汁都OK
嚟霧島飲霧島水
十一二點舒舒服服咁去瞓
竟然三點幾俾個被舖熱醒咗
好啦，悶悶地又好似餓餓地咁
食吓舊酒店送嘅和菓子
紅豆餡，不過居然唔太甜
又幾好食喎衰鬼
响露台慢慢嘆
仲有天上無敵星景
又睇到幾粒流星
攤吓個人涼返吓
又捐返入被兜瞓過…
-———————————————-
延伸閱讀：Happy Days！鹿児島宮崎！ (10D9N)
食飽飯，抖陣之後當然係去浸溫泉啦
浸完舒舒服服，然後飲返之嘢先…
牛乳、ブルガリアヨーグルト、コーヒー
明治牛乳嘛，應該同之前飲嘅無分別啩…
明治ブルガリアのむヨーグルト（meiji Bulgaria drink yogurt）
都應該同之前嘅唔大分別嘛？
最多咪稀D囉… 或者…
咁咪試吓未試過嘅明治コーヒー囉
吖～ 甜甜地嘅iced latte
奶味重啡味帶苦但係甜味已經補返晒
幾香帶微苦甘甘地咁啦
唔好當佢係靚啡飲就OK
志在試吓浸完溫泉㩒枝玻璃樽嘢飲吓幾入鄉隨俗啫（嘻）
-———————————————-
延伸閱讀：Happy Days！鹿児島宮崎！ (10D9N)
いただきます。
一坐低就已經set好晒
等滾等熱就食得喇～
含酒精，當然係最好嘅welcome drink
霧島焼酎 お湯割り
一杯仔真係唔夠喉
嚟霧島唔試呢度D酒真係會對唔住自己
用熱水兌開都唔錯㗎
呢隻酒入口好順滑
味道香，唔辣，真係好正！
前菜：
（前）菇滑滑地唔錯；
（後）梅味矮瓜好正！
主菜係呢個鍋 x 鐵板！
個鍋烚烚吓；鐵板有得燒
一吃過玩晒嘻嘻～
肉厚片D燒會好味D
肉嚟講雞同豬都幾好
牛就瘦咗D少少嚡（雖然最貴係牛）
野菜都算新鮮，矮瓜一片俾我燒燶咗
另一片… 烚啦都係
响好快手就跌咗幾千円之後…
（係㗎喇搭的士咁貴梗係要提一提）
就到咗旅程嘅第一站：溫泉旅館（撒花）
因為唔係响房裡面食
所以已經鋪好床鋪
（之後發現左右兩間房都係房裡面食，
但係陣味我响走廊都聞到，
咁咪成晚都熏住D嘢食味？
之後一日同D衫呀行李甚至個人都係嘢食味？？？）
有露台俾我好好嘆茶，正！
最正都係呢張
員・工・手・寫・信
無計！我真係好buy呢種人情味嘅嘢
就算知係罐頭信
至少係親手寫
我真係好用心去睇㗎，多謝～
不過宜家要去醫肚先…
-———————————————-
延伸閱讀：Happy Days！鹿児島宮崎！ (10D9N)
「我响日本搭的士呀！」 100%聽到嘅回應：「好貴㗎喎！」 只可以答返句：「係呀！」 .
.
.
.
.
.
你估我想㗎？！
班機18:00抵達空港
過好海關拎埋行李已經响國際線飛奔內陸線個巴士站
班拉屎巴士係18:40
本身真係真係真係啱啱好夠時間
最衰！衰多口問人個站响邊！
條九州男児點我去反・方・向！！！
（好有D中國人問路然後俾人亂點嘅feel囉頂）
最後抵達個巴士站已經係18:43
無啦！上山班尾班車連車尾都見唔到…
人生就係咁，意外嘅嘢
咁唔通坐响機場喊咩？
喊都無巴士㗎啦
透順條氣（真係跑㗎大佬）咪死死地氣拖喼去的士站搭的士囉
（真係講出嚟都覺得滴緊血 TT）
