[丼] 初見 Shoken

都係繼續同佢食
呢間唔係最初畀我揀嗰幾間之一
不過佢send得過嚟問Do you want this嗰陣
就知道其實係佢諗過踱過再開口問
間舖個名幾好聽望啲相又唔伏
加上任何情況下都係會相信佢嘅選擇啊！

初見四式刺身丼配味噌湯
－ 三文魚、油甘魚、帶子、甜蝦、玉子、蟹柳
魚生新鮮又厚切，邊會唔好食呀？
佢個飯base係有飯料嘅
唔怕就咁食晒啲刺身個白飯會好寡

初見特選海皇蟹刺身丼配味噌湯
－ 蔥吞拿魚蓉、蟹肉、蟹膏、海膽、帶子、蟹柳、玉子等
吞拿魚蓉同蟹膏海膽喎
完完全全開正我嗰範啱我河車！！！
（都話佢完全知我點諗㗎啦）
將香爆嘅嘢集於一身
唔止係好食，對我嚟講直頭係大滿足
除咗蟹柳囉分畀佢食啦就咁話哈哈

初見壽司拼盆配味噌湯
－ 7件特選壽司、玉子、小卷
食過翻尋味之隔幾日又再嚟食過
覺得熱嘅佢就食壽司
睇個樣都知新鮮無咩好挑剔

月見牛肉味噌煱配白飯
吹完冷氣嘅我有啲凍就食吓火鍋

除咗刺身係好新鮮；肉品亦然
肉下面仲有大堆菜啊豆腐啊芋絲啊blablabla
唔會滯不過堅係好L飽！

初見三式刺身丼配味噌湯
－ 香蔥三文魚腩蓉、油甘魚蓉、甜蝦、玉子、蟹柳
隔幾個月又突然走去食
真係就算平日去都係keep住好嘅水準

味噌湯 w/是日花茶 - 玫瑰花茶
個湯就唔係咩好令人驚艷嘅款式
但係lunch set湯又唔需要過份高要求
花茶都係花加熱水咁不過啲花嘅份量都唔少

是日花茶 - 菊花茶
話明是日花茶當然有唔同

凍柚子蜜
啊！少有地嗌甜嘢飲仲係糖漿嘢
不過都okay好飲又有柚子香，唔錯嘅

其實次次望到隔離枱都有人嗌板燒吉列牛
好想有機會試一次
可惜我諗已經無再有呢個機會喇…
有時啲嘢只可以話有遺憾先稱得上完美
就當安慰吓自己，whatever啦～