[食道鉄道北海道] Day6： 稚內 → 札幌

都話瞓醒就有好天氣㗎啦
今朝又係比陽光曬醒
冇咩嘅咪又去浸溫泉囉
（擒晚只可以室內場今朝就有開埋露天嘅，更爽！）

去返擒日無可能影到嘅稚內駅先
條最北嘅鐵路係穿出個站㗎

啦啦啦～ 朝早就飲吓雪印 ソフトカツゲン
當然因為係北海道限定嘅乳酸飲品
牛奶味重啲又冇咁甜嘅益力多
喂好好飲呀佢，北海道人真係好幸福呢

响稚內行吓 @宗谷湾

北防波堤ドーム
擒日如果嚟咗呢度我就應該返唔到嚟

而家都咁大風勁大浪

嗱嗱嗱～ 我承認响酒店嗰陣
有三秒諗過不如出去追風睇浪
但係要珍惜生命啊！

行去稚内副港市場

呢邊個市場極級遊客
冇嘢好行，求其兜個圈就算

買咗枝稚内牛乳同北海道ミルクブッセ做簡單早餐

呢個市場嘅港ギャラリー就幾得意

一條懷舊街仔（稚内ノスタルジー）
搞到玩太耐不知時日過
要急急急返去酒店check out

然後食奔廚 @青い鳥
稚內嘅塩ラーメン
唔好睇個湯頭咁清就好似冇味咁
味道濃郁唔死鹹，香到爆～

食完就早少少拖行李去車站
等車嗰陣有隻ゆるキャラ突然走咗出嚟
佢成身海帶，叫出汁之介 

稚內 → 旭川
（特急サロベツ、261系）

byebye JR日本最北端の駅（揮手）

話說擒日打風喎…

tea time就食超豐富嘅稚內の駅弁「海の七つ星」
有蟹、海膽、数の子、元貝、螺、三文魚同口爆子
好食到癲！！！

飲嘢就係北海道限定嘅酸酸地果味水
I LOHAS(い・ろ・は・す) - ハスカップ

旭川 → 札幌
（特急ラッピング、789系0代）

札幌（札幌駅）
放低行李之後再响站附近完成「任務」
（話說係之前响大阪mission fail，今次終於mission complete）
就繼續走出去覓食

慢慢咁行，沿途就會見到啲地標… 
首先係札幌市時計台

同さっぽろテレビ塔

再見到好可愛嘅札幌市電

and 狸小路商店街

落住雨咁一口氣行咗2公里
就係為咗嚟五坪食厚岸産のカキ呀
好大隻好好食啦仲好好好抵食
老細係超nice嗰隻
真心極級推介！！！

食完幾隻蠔就走去いただきます。 等位
有諗過食ジンギスカン (成吉思汗)就去元祖店だるま
不過只有いただきます。係全北海道産羊嘛
嫩滑唔羶又帶肉香
呀呀呀真係好好味呢～

好夜喇加上今日都幾勞碌吓
係咁意兜咗轉ドン・キホーテ
就返酒店休息喇
無計啦，房裡面有按摩椅
（係呀每間房都有㗎）
死霸住唔郁㗎喇我！
有咩聽朝先講啦～～～