[泰] 泰然

因為泊車方便加上間嘢都keep住啲品質
唔難成為我同佢食癲嘅飯堂…

泰式炸蝦片
脆卜卜重香料味嘅泰式蝦片會有人唔鍾意食㗎咩？！

泰式生海蝦
我哋呢兩隻生蝦lovers有生蝦又點會唔嗌？

咁呢度啲蝦又堅係大隻兼爽身嘛！
加上係一半紅一半綠嘅辣汁
味道調得夠晒辣仲成杯shooter咁又睇得又食得
點會唔次次都order啫？！

泰式酸辣鳳爪沙律
個味夠晒酸辣嘅鳳爪食得好爽
鳳爪嘅爽口度絕對唔會輸畀啲配菜西芹甘筍同洋蔥
作為BB班辣度嘅我覺得好辣
不過唔辣又邊好食啊？

香芒軟殼蟹米紙卷
從軟殼蟹到芒果再到塊大生菜都食得出新鮮
一次過捲入煙韌米紙皮裡面
蘸埋甜辣醬，將外脆內軟又爆汁嘅蟹；
滑身微甜嘅芒果；軟腍嘅粉絲；
爽脆生菜同韌身嘅米紙共冶一爐
層次超豐富味道有鹹且甜非常過癮！

小食拼盤（小）
（蝦餅、春卷、串燒、雞翼）
蝦餅：炸得香脆肉質彈牙仲好厚身，正～
春卷：外皮酥脆內裡係滿滿爽口鮮甜嘅蔬菜絲
串燒：（下張full shot再講）
雞翼：炸到雞記咁外脆微辣裡面仲會滴雞油！

串燒沙嗲（雞、豬）
有焦香嘅味道然而唔會燒到乾嚡柴
肉身都比較厚食得返本身嘅肉味
沙嗲醬足花生味同夠甜，會忍唔住繼續食（嘻嘻）

炭燒豬頸肉
面層焦香頸肉夠肥香juicy
配埋個酸辣汁一齊食就唔太漏

冬蔭功海鮮湯（選用原隻大頭蝦）
面頭一片紅海咁好似好辣咁喎…

攪勻之後係橙色嘅同一般無異（笑）
辣㗎不過唔係辣到飲唔到
除咗辣味仲有香茅味同濃濃海鮮味
因為裡面有好多料
又大蝦又魷魚又青口等等咁
個兜下面係有個細火keep住滾滾
所以唔係飲得好慢嘅話都一直飲到熱湯

蕉葉烤焗烏頭
烏頭肉質偏結實魚多汁味濃
用嚟燒就較乾身
不過加埋酸酸地醬汁同面頭鋪滿嘅香茅碎都幾惹味啊！

泰式經典明爐烏頭
畢竟都係明爐烏頭啱佢食啲
（佢鍾意蒸魚嗰種較濕嘅口味啊哈哈）
每次一上枱已經聞到香味
個煮魚肉唔會太韌
加埋啲香料同配料夠晒入味
連啲湯都飲得唔好嘥
明爐嘛… 都係下面有個火嗰隻
唔怕煮得耐魚肉唔好食嘅話可以慢慢嘆

泰式鐵板蠔仔炒蛋
唔係潮洲台灣式炸蠔餅嗰種乾身嘢
係爆蛋 x 勁多蠔嘅組合

（真係有好多蠔㗎）
蛋漿煎到有金黃嘅色澤
佢個濃郁蛋味唔會輸比蠔味
蠔仔粒粒咬得出汁好鮮味
裡面仲有芽菜唔會令碟嘢得個腍字成pat嘢咁

招牌焗黃咖喱麵包軟殼蟹
啲咖喱汁好似火山爆發咁澎湃
咖喱汁重椰香濃稠同偏甜
唔點食得辣都完全食得到嘅
軟殼蟹就算浸住响咖喱都仲係外脆內爆鮮甜肉汁
個方包出面硬身裡面軟熟無咩味
用嚟蘸咖喱汁就啱啱好

招牌去骨豬手煲
軟腍一夾分離式豬手
濃郁滷汁不過唔會覺得鹹，幾好啊！

曼谷火山排骨
酸酸辣辣咁，肉質超～ 腍～
係一咬就骨肉分離嗰種，好食呀呢個（推）

蝦醬炒通菜
惹味通菜新鮮無草青味
唔食辣嘅話就揀蝦醬就最穩陣
連一向揀飲擇食咩都話唔啱嘅屁孩都肯首叫呢樣（thanks god）

泰式馬拉盞炒椰菜苗
食泰式嘢點可以冇椰菜苗啊
以唔太辣嘅馬拉盞調味
就帶著椰菜苗本身個甜味

蒜蓉炒上素
炒爽脆大雜燴咁啦
落埋一堆炸蒜，唔會嗆喉又提香

招牌蟹肉炒飯
啲蟹肉份量都幾多
唔係細細一絲絲咁而係一舊舊嘅
個飯炒得幾乾身亦唔油膩，唔錯呀

鮮蝦炒金邊粉
酸（落咗青檸）甜金邊粉
除咗彈彈牙新鮮蝦仲有其他海鮮好足料

榴槤波波
雖則本身嘅甜品menu芒果糯米飯同糕點嗰啲
但係最吸引反而係小食menu裡面嘅榴槤波
超脆炸漿糯米皮夠韌裡面啲榴槤好raw非常美味
勁鍾意呢個，超推薦！！！

椰青
夠凍亦係嫩新貨冇嘢好挑剔

珍多冰 | 青檸梳打 | 咸檸檬七喜
啲冰好多吓不過係細粒好多嘅碎冰
珍多冰好足料卻唔會減低濃度
梳打冇七喜咁甜（廢話）
青檸咸檸各有所好兩樣都唔差啦

芒果芝士沙冰
沙冰係無得轉少甜嘅
加咗芝士奶蓋就多啲層次
濃厚啲連芒果沙冰嘅濃郁好味啊！

火龍果芝士沙冰
相比芒果，呢隻火龍果沙冰更好飲
清甜啲唔似芒果咁濃甜
連埋芝士奶蓋飲都唔會覺得super full

（嗝～～～）