[小島怡情] 塔門
懶懶閒 懶懶行
去塔門慢慢慢兜一圈
有山有水有草有牛
由黃石碼頭搭船
經過高流灣
（明明google話0%會落雨都突然落驟雨）
落咗船都仲有微微雨
咁就去避吓雨順便食個奔廚
海膽炒飯
HIMHIM千叮萬囑叫我嚟塔門一定要食海膽炒飯
身為海膽精嘅我當然唔會唔食啦
個飯炒得夠鬆粒粒分明
有海膽有蛋個味夠香
碟嘢唔會好鹹唔驚食完生腎石
仲唔會好油喎唔錯唔錯
白灼鮮魷
哇哇哇！新鮮就係好好食
爽滑香仲一咬就斷
少少豉油提吓味就夠
白灼海螺
野生大眼螺，白烚就已經好好味
唔會好鹹嗰啲海水味
螺肉大大又好彈牙
點啲辣椒醬食就啱啱好
青島 & 咸檸茶
解渴嘅啤酒係必備㗎啦
（食海鮮配酒係常識）
但係間嘢嘅咸檸茶唔太甜
個咸檸有香茶底又唔澀幾好飲喎
嘢食完雨落完，出發～～～
沿水地區一般都係拜天后
天后古廟
唔好睇佢咁新淨都自稱為古廟
因為佢嘅真身真係好夠古
响康熙年間興建（一六幾幾年）
廟頂嗰啲石灣陶瓷都過百年歷史
成間廟仲係一級歷史建築物
真係唔拜都用少少時間參觀吓
廟前嘅瓦片屋 (頂)同煙囪
先向下面行到落下圍
呢個位係填出嚟嘅
泊咗啲漁船
啲水好清好清（玻璃水？）
一望就見到水底喇
然後沿路向上行
就到好多牛牛聚集嘅塔門營地
營地呢邊望出去嘅風景
雖然啲牛牛一般都係食草
（牛os：「影咩呀𡃁仔？」）
但係响涼亭到坐吓
就會見到啲牛會牛咁眼望實
睇吓你有冇嘢食
我啱啱食完嘢
冇嘢要拎出嚟而家食
不過坐响前面草地嘅姐姐們有呀
啲牛牛梗係唔放過 XDDD
搞到嚇親啲姐姐一路執嘢避走
（牛os：「你仲好講，冇野食就過主啦！」）
嗱～ 冇嘢俾佢食就會以眼神鄙視你！
no la，佢係一隻牛媽媽
要食多啲嘢同脾氣差啲都正常嘅
令人心曠神怡嘅景色
行出啲就見到都幾大浪
再行樓梯上山
身邊係不知名嘅植物
回頭望兩邊景色
一邊山景再加少少海
另一邊圍住山中有個石灘
行呀行 上呀上
然後上到冇風景睇
對對聯唔啱廣東話平仄
連中文都係掉轉嚟寫嘅龍景亭
上面得個天
下面俾啲生得超高嘅植物遮實晒
乜Q景都睇唔到
鬧還鬧都會坐低响個亭度
輕輕鬆鬆飲返杯
呢隻合同酒精 - あっさり梅酒
勁香，唔會過份甜
亦唔會帶有強烈酸味
8% 酒精入口順滑一啲都唔嗆喉
好好味呀～～～（推薦推薦）
穿過龍景亭繼續行
終於有返靚景
行～ 山～ 路～
呢邊係就咁來回行
好長好長嘅攀藤植物
走返回頭路
返落營地
然後沿著海邊
响疊石方向行
望住蚺蛇尖同高流灣
落下面就會去到塔門洞
即係啲岩石俾海水侵蝕侵蝕蝕蝕到有個窿
今日落過雨完全唔適合入水窿呀
好寫意
啲浪沖埋嚟都幾大聲
去到疊石
就見到一大堆石（廢話）
同呂字石：即係兩舊四方疊起嘅石
落樓梯
落到打浪排
堅大浪，好適合衝浪呢～
一直沿海行
就見到一列漁排
塔門呢度係養殖海膽同魷魚
到咗漁民新村
買零食：墨魚條同魷魚絲
差唔多兜完一圈
見到行上少少有間教堂
小島有教堂係較少有
上到見到間嘢俾樹遮住就冇特別影低喇
都只係粉紅 x 白嘅建築物一間啦
見到碼頭，就即係完成一個圈仔
有好多快艇仔兜客
不過隻街渡已經埋站
唔駛特登搭快艇
準備上船
返到黃石碼頭喇！
～旅程完結～