All Posts
抽水呢家嘢，都係交返比專業嘅好…
抽得之餘又夠靜
（指運作中，滿水個「咇」聲好L嘈）
改良版Grade 1係一級能源標籤
慳電真係好緊要㗎
畢竟地方潮濕絕大部分日子都要抽濕進行中
有得自行set濕度，環境一抽到個濕度就自己停
唔會乾到皮膚爆裂呼吸困難唔錯啊！
最重要係個外型靚仔
畢竟日日都要對住佢㗎嘛～
話說，支嘢已經用咗佢幾年…
醫療級手術刀用SUS316L鋼水
平日仔細清洗到都可以安心使用
（雖然用洗眼鏡嘅超聲波機先最好不過市面上無放得落飲管嘅size呢）
但係慣常好少飲凍飲使用率唔算好高
然而呢排戴住口罩就用多咗
以最小幅度拎開個罩
用盡一切方法減少同病毒接觸
how dare you唔係破壞環境而死係中咗病毒而死嘅話
Greta Thunberg會唔放過你啊（！）
所以保護自己保護人仲保護埋海龜減少垃圾啦都係…
我知，家居清潔好重要
不過我真係好懶呀嘛…
有咩就等佢搞掂啦！！！
一次過掃、吸、拖，唔駛煩
原本十五十六要唔要有水箱滴水落布拖地嗰種
但係咁嘅話拖拖吓塊布會超污糟仲衰過乜
所以都係買呢種陽春啲而做得多嘢嘅
5.7cm好薄機身，櫃底梳化底都去得到
好似隔離房開風筒咁嘅聲唔會好嘈
佢搞掂間屋之後
都只係掃返機身啲塵倒咗塵箱啲垃圾同搣開塊纖維布去洗
又唔算好多手尾要跟
最麻煩係成本控制嗰陣：
舖頭特價 x 有cash coupon x 信用咭打折 = 要自己拎
然而只係俾咗十！幾！蚊！就買咗佢返去，辛苦啲都要～
冇咩嘅… 分享吓去韓國daiso入手嘅好物啫～
3M Nexcare 순면마스크(블랙)
（黑色純棉口罩啊啊啊）
3M嘅出品一般都有品質保證
100%純棉，罩位好薄兩層都唔覺厚
舒服貼面吸汗又透氣
條繩唔會好箍，戴足一日都OK
最緊要係佢唔係MIC而係made in Korea
咁貼身嘅嘢真係安全先最重要
₩2000，日日用完拎去洗重複使用好鬼抵！
係可惜在只見韓國daiso有售
唯有飛多幾轉資金外流咁啦～
平日算注重口腔清潔衛生
又會用佢嚟減少食零食
香港要買香口膠呢家嘢基本上得嗰個美國牌子
美國嘢本身冇咩㗎
不過間嘢一直課金去黨視
所以我就連一粒香口膠都唔再食佢！
雖然去旅行嗰陣都會買
（手頭其實有日本韓國荷蘭等）
但係都會有食晒嘅時候嘛…
傻啦，呢個小土地仲有呢間國貨公司M&S啊
仲係瑞士製造我就係鍾意歐洲嘢呵呵
繼續樣衰衰chew個gum先～
因為好興奮，忍唔住要推薦一吓～
（又）買咗部新電腦！！！
個size係咁細細，响公司收貨都唔覺眼
無睇錯，佢就係部電腦嘅真身
嗱～ 佢個spec都夠堅㗎 ↓↓↓
Broadcom BCM2711, Quad core Cortex-A72 (ARM v8) 64-bit SoC @ 1.5GHz 1GB, 2GB or 4GB LPDDR4-3200 SDRAM (depending on model) ← 財大氣粗買4GB 2.
佢係一把非常之好嘅長遮！！！
セブンプレミアム ライフスタイル
SEVEN&i Premium Lifestyle出品
日本七仔好物，美妙嘅黑色唔似港版紅綠橙白7到爆
修長嘅身形，手柄粒制遮骨遮身遮布都係滿滿設計咁
唔只係得個樣㗎，遮風擋雨樣樣都做到
所以佢有拎咗Good Design Award 2016 BEST 100
然而風雨不改陪咗兩年嘅佢（正確嚟講係一對）捐軀了
硬硬淨嘅佢唔係爛咗，係要嚟擋更加重要嘅嘢！！！
至少要擋到幾多得幾多，加油啊你哋～
你哋唔係best 100，係我嘅THE BEST！（敬禮）
係我衰！我係人渣！
之前嫌ECO Can plus漏水兼唔係黑色
好啦買咗個:chocoolate保溫杯都唔夠兩年
就覺得自己造成嘅風霜痕跡刮到佢一條條個面唔再黑
然後當然就會一堆藉口嫌棄佢
咁又俾我見到呢個ZUCCa嘛
ZUCCa話晒都係響啲嘅牌子吖
少少虛榮都唔過份啊！
黑色啦矽膠啦仲摺得埋喎
打開係放到355ml
個蓋好好咁cup實就唔會漏水！
（新入手總是美好的）
ELLE呢啲廣告雜誌真係會响呢啲時候先會買
（揭過fast read一次就掉就咗，墊煲底都怕本嘢熱到黐落枱）
然而杯呢家嘢一屋都有幾千個
捐極都仲會有嘛…
好唔生性囉我，所以我一定會好好哋用耐啲㗎喇… 應該……
紙巾呀抹手紙真係好方便
抽一抽抹一抹乾手淨腳
然後呢張紙咁嘅物體
佢嘅使命完成
伴隨著係生命完結
直接入堆！填！區！
e？乜佢唔係紙嚟㗎咩？
唔可以回收㗎？
係呀！紙巾係冇得回收再造
所以用過嘅紙巾只係件純垃圾
話說今日係無紙巾日
不過就算係咪呢啲日子
我都會帶住手巾
奢華感足帶啲虛榮感嘅Burberry
大大條正方形輕薄類型
多位抹易摺得細而且快乾
一用就用咗十幾年
平日都係掉去洗衣機度洗㗎咋
咁多年啲色呀線呀都冇點走
除咗抹嘢之外
有時會拎佢嚟包嘢
就咁包就用少好多細膠袋
唔知由幾時開始
就變成帶手巾嘅只係BB小朋友幼稚園生
其實從細細個唔係已經知道
因為唔係所有電器都係叉電嘅
所以都有時要買電芯㗎
但係買即棄型電芯真係好唔環保喎…
有咗呢隻充電電芯就完美解決問題
panasonic呀sanyo呀嗰啲都有啦
做咩買姨媽傢俬㗎呢？
（人哋個名叫宜家家居，不過就係講慣咗改唔到口）
平囉！
就係咁簡單（七折咁上下啦）
加上個叉電器細細個
用USB叉都得夠方便
唔係平嘢就俾啲流嘢㗎
個叉電器係MIC嘅
然而最緊要嘅電芯係made in japan㗎
覺得就算爛船都有三斤釘
日本製造嘅電器應該都唔會係渣嘢
（係㗎喇，我做人就係咁膚淺咁表面去睇嘢）
我一般用要入電芯嘅電器係低用量電
1000/500 mAh (AA/AAA)已經夠駛
佢呢個系列仲有高用量嘅2450/900 mAh
個gym ball係要嚟鍛鍊嘅！
不過我喎，懶到出血嘅我喎
又點會係拎嚟碌吓碌吓做運動吖
齋响屋企當凳坐咋…
唔係講笑就咁坐吓波就鍛煉到呀吹咩？！
因為坐波嗰陣個身體一定要平衡
咩寒背翹腳坐姿唔正確身體歪斜一律NG
坐得耐其實都會攰從而啲鬼鼠肚仔肉就byebye
唔好話減肥咁bouns嘅嘢吖
姿勢好，就連腰骨膊頭都唔會痛
嗱～ 除非買個部返屋企只係擺埋一邊
係咁意用佢都會對自己好呀
點都好過呢度痛嗰度痛嗰啲吖
買個波肯肯定抵過一次治療
就算好似我咁本身無病無痛都好
咪當預防勝於治療囉
真心推介呢種唔辛苦嘅「練習」㗎～
好似卡片咁薄嘅鏡
輕飄飄，放响銀包card holder度就啱啱好
好揸手嘅水滴形
個公仔樣仲要好得意
呃～ 最厲害係佢打唔爛㗎
多謝晴晴嘅手信（muah）
