[川] 麻辣風雲 - 水煮牛肉客飯
做人就係要不斷接受挑戰
抱得阿B掃葵廣，當然可以再試其他嘢！
麻辣風雲 - 水煮牛肉客飯（小辣）
抱住佢食熱辣辣紅噹噹有湯汁嘅嘢！！！
另外嘛，係挑戰吓一個唔點食辣嘅我去食辣
BBbaba問我食咩嘅時候我腥呢張相畀佢
佢第一時問「你食呢啲架咩」咁
不過都係覆佢「試吓嘛」
連小不點都問我「你以前唔食呢啲嘢，點解啲口味變晒」
其實都係見之前未試過就試吓啫
唔駛太緊張嘅 XDDD
不過話時話，兜嘢都幾豐富
牛肉係用牛肩肉，牛味香又夠腍
係嘅，連辣味都蓋唔晒啲牛味
一直唔太鍾意食辣除咗條脷會痛之外
（辣同甜酸苦嘅味覺唔同，係痛覺嚟㗎！）
就係辣味好霸道令到啲食材本身嘅味冇晒
呢兜係食到牛味都唔錯
跟住有爽脆蓮藕芽菜同爽滑嘅木耳
腍滑彈彈牙嘅菇
又有吸晒湯汁超辣嘅豆卜
仲有碗底滑滑薯粉
但係我當然唔係靠薯粉食飽
因為太辣喇，都係喪扒白飯啦～
幾好食啊！至少味道夠香辣同有唔同質地嘅嘢食
太辣！冇呢個唔掂！
其實今日都唔算太挑戰
阿B大部分時間都係瞓緊覺
然而食到大半嗰陣都醒咗
開始搞搞震嘛就畀佢試吓味
佢食咗筷子一滴麻辣後就猛隊水
冇喊㗎，好勁呢～～～