[粵] 楚撚記大排檔

一路揭揭揭個menu就超～ 煩～ 惱～
我同佢兩條友得兩個胃
但係又樣樣嘢都好想食喎，點算好？

竹蔗茅根紅蘿蔔馬蹄水（冷）
足料去煲所以夠晒甜啊！

杞子龍眼菊花蜜（冷）
都好飲嘅，不過個菊花味濃啲
對大肚中嘅我嚟講好似寒咗少少咁啫

楚撚記脆皮燒BB鴿
鞦韆大搖籃咁上
不過隻燒鴿個樣比個裝飾更吸引
隻鴿夠晒鹹香唔使蘸淮鹽都okay
外皮脆卜卜鴿肉又會漏油真係好鬼正！

芝士琵琶豆腐

一定要蘸上芝士醬

就咁蘸都唔夠，倒多啲倒多啲啦please

啲琵琶豆腐隻隻都係脹卜卜
咬落回彈又香魚味
係就算係猛咁倒芝士醬都食到嘅魚味
佢最勁係炸嘢但係一啲都唔油膩，好好食呀！

黃金椒鹽粟米
呢個係估佢唔到嘅驚喜菜式
鹹香嘅椒鹽味配飆汁嘅粒粒粟米
外乾內爆甜甜嘅粟米汁
只可以形容為欲罷不能嘅美味（大大心）

香煎黑松露手打蓮藕墨魚餅
蓮藕爽脆墨魚滑彈牙
煎過之後上下焦脆味更濃郁
係略嫌墨魚味畀黑松露味蓋過
無計，黑松露進來都係味霸嘅食材…

酥炸黑松露芝心手工乒乓球牛丸
唔係賴尿牛丸卻一樣會爆漿
同墨魚餅嗰個黑松露有啲分別
就係牛丸同芝士個味終於大過黑松露
而牛丸個面因為係炸過
會比一般湯牛丸乾身好多
加上味道偏鹹嘅，送酒就一流喇！

脆皮炸大腸（鳳梨底）
個腸皮脆到爆中間層脂肪去走咗唔太肥
裡面啲肉唔會好韌一咬就咬得開而且無臊味， 正！

難忘漁港蝦醬骨（海山骨）
蝦醬炸薄豬扒呢樣嘢點可以唔食？！
味道超～ 濃～ 個蝦醬味出到爆廠
啲肉唔似佢炸出嚟睇到個樣咁乾好juicy
好好肉地兼且勁鹹香，大肚無酒飲真係好可憐 TT

白灼八爪魚仔配秘製超惹味醬汁
啊！終於唔係碟煎炸嘢
新鮮八爪魚仔就咁白灼已經好好食
有埋提味薑蔥絲同超爽口芽菜
加埋個惹味辣辣地更不得了
冷盤不輸熱氣嘢嘅送酒程度堅係勁呢！
（繼續奈何無得飲酒）

菠蘿拔絲咕嚕肉（梅頭）
梅頭肉就係又香又腍身囉
but食到後期再隊甜多過酸嘅嘢就有少少吃不消喇

豉汁蒸魚雲
勁多豆豉，爆鹹（完）

蕃薯糖水
糖水係送嘅但絕對唔係求其出品
碗嘢熱嘅，蕃薯香甜糖水base唔會濃甜
卻足片糖同老薑味

清保涼糖水
凍嘅話就係呢款， 清爽唔會爆甜
作為飯後甜品仲吔咁多熱氣嘢就啱啱好

話明大排檔啲嘢梗係又鹹又熱氣好送酒
然而無酒飲咁食法真係好漏
嘢係好好食嘅，樣樣都係料新鮮廚師又煮得好
要鑊氣夠鑊氣求其餐牌揀樣都無得輸
不過都係適合多啲人食嘅日子
嗯… 有時限嘅餐廳又好難大班人食喎有啲矛盾
好似我同佢兩丁友嘅話去食多幾次先得啊
鬼叫佢樣樣都鬼咁吸引咩？！